ХIукуматрал ва жула дянивсса яла гъанмур идарану хIисав бан бучIир социал зумунусса буруччаврил идара. Мунийн учай «Управление социальной защиты населения» куну.
Уттигъанну на, райондалул агьалинан цукунсса ка-кумаг буллай бурив кIул буван, хьунаавкьуссияв му идаралул каялувчи, ХIасаннул арс Зураб МахIаммадовлущал.
— Зураб, зул идара бур хIукуматрал хIукмурду инсантурачIан биян буллалисса идара. Ци кумагру бувайссар зу инсантуран?
— Ми кумагру бавуртту дур личIи-личIисса. Цалчин, жу аьркинсса чагъарду щаллу байхту, бишайссар оьрчIансса пособия. Ми бур оьрчI увни цал булайсса, яла ганал ца шин ва дачIи хьуннин булайсса, 16 шин хьуннингу зуруй цал булайсса. Дур мукунна ххюлчин увсса оьрчIан цал дулайсса 10 азарда къуруш, мигу дулайссар урчIулчинмур оьрчIайн бияннин. Яла ацIулчинмур оьрчIан дулайссар 300 азарда къуруш. КIинничалт бувминнан дулайссар 20 азарда, шамличалт бувминнан дулайссар 100 азарда къуруш. Жула райондалий бур ххюва оьрчI ххишалагу бувсса ниттихъул. Бакъар цалсса ацIва оьрчI бувсса ниттихъул.
— Бурив жучIава дяъвилул гьурттучитурал щахъами ливчIун?
— Мукунсса щахъами бур 15.
— Цими ур захIматрал ветеран?
— ЗахIматрал ветерантал ур 640 инсан. Шиккува ххи бан ччива жула райондалий яхъанай ушиву дяъвилул шиннардий къинттуллух зий ивкIсса 122 инсан. Миннайн «Участники трудового фронта» учай. ЗахIматрал ветерантуран зуруй дулайссар 526 къуруш ва тIювалул куклушиврун –131 къуруш. Къинттуллух зий бивкIминнан дулайссар 793 къуруш. Ялагу буссар азарда къуруш зуруй ласайсса инсантурал группа. Ми бур хасъсса, Дагъусттаннал ХIукуматрал хIукмулийн бувну, шяраваллаву яхъанай, зий бушиврийн бувну, тIювалул куклушиврун арцу дуллалисса инсантал. Миннавух бур учительтал, медициналул зузалт, социал кумагру бан багьайми, ветеринариялул зузалт ва цаймигу. Мукуна ур жула райондалий Чернобыллал АЭС пIякь увкуний зий ивкIсса 4 инсан, миннангу булайсса пособия буссар.
— Ци кIулшиврул инсантал бикIан багьлагьиссар зул идаралий зуншиврул?
— Хъунаманал ва хъиривманал чара бакъа дикIан багьлай бур лахъсса кIулшиву. Му кIулшиву дикIан багьлай бур экономистнал, педагогнал ягу юристнал. Вайми жул зузалтрайн учайссар «специалистал» куну, вайннал дикIан багьлай бур дянивсса кIулшиву. Духьурча лахъмур кIулшиву, мугу хъиннува хъинни.
— ЗахIматрал ветераннал цIа щин дулайссар?
— Махъсса шиннардий ва цIа дулавриву дахханашивуртту хьунни. ЦIа дулайссар Аьрасатнал министерствалул дуллусса грамота, барчаллагьрал чагъар буминнан. Хъиннува хъинссар Аьрасатнал медаль, орден духьурча.
— Зураб, чан-кьансса виятувагу бувсун ччива.
— На увссара Ваччиял шяраву. Ттул буттайн ХIасан, ниттийн Мааьзат чайссар. Бутта ур учитель, нину бур хIакин. Школа на Ваччав къуртал бувссар. Яла дуклан увхссияв ДГУ-лувун. Къуртал бувссар экономикалул факультет. Яла увцунав армиялийн. КIира шин дурссар Майкопрай къуллугъ буллай. Ттуя хьуна хIаписар, дуллуна хъунама лейтенантнал чин. Муния махъ зий уссияв МахIачкъалалив банкрай. 2015-ку шинал ивтунна Ккуллал райондалул Соцзащиталул управлениялул каялувчину. Рязину ура ттула даврия ва ттула канилу зузисса зузалтрая. Цинявннал цIарду такну кIицI къадулларчагу, вай цала касмулул кIулчутал бур. ЧIалну духьурчагу, ттун ччива жула райондалул жяматрахь ва цинявппагу лакрахь барча дан цIусса шин. ЦIуллусса, тIайлабацIу бусса шин хьуннав!
Ихтилат бувссар
ХIажимурад ХIусайновлул
