Хъунасса балетмейстернал цIанийсса школа

Гьунар бусса оьрчIансса Мурад Къажлаевлул школалий хьунни СССР-данул халкьуннал артист Олег Виноградовлул цIанийсса отделение тIитIаврин хас дурсса шадлугъ.

Зулайхат Тахакьаева
Школалийн заназисса оьрчIру гьуртту хьуссар ттигъанну Олег Виноградовлул бивхьусса «Асият» балетравухгу.

— Ва премьералух ялугьлай жула хьунни чIярусса шинну. Шиккун бавтIминнал цIания дакIнихтуну барчаллагь тIий бура Олег Виноградовлухь ва Мурад Къажлаевлухь, оьрчIру классикалул произведениялувух гьур­тту хьунсса сант хьун даврихлу, — увкунни культуралул министр Зарема Буттаевал.

Муния махъ Зарема Буттаевал ва Лакрал райондалул бакIчи Юсуп МахIаммадовлул Олег Виноградовлун дуллунни хъама­къабитулунсса бахшишру. Ахирданий хъамал бувцунни школалийсса Дагъусттаннал музыкалул культуралул музейравун.