[dropcap]Я[/dropcap]нварь зурул 28-нний «Дагестан» РИА-лул конференц-залдануву Дагъусттаннал ГИБДД-лул управлениялул хъунама, полициялул подполковник Александр Шалагин хьунаавкьунни республикалул журналистуращал.
А. Аьбдуллаева
Ларгсса шинал дурмунил хIасиллугу дурну, ванал бувсунни ци чаран ляхълантIиссарив ттиния тихунмайгу, ххуллурдай мюхчаншиву дузал даву ва апатIру чан баву мурадрай.
2019-ку шинал, хьхьичIмур шинах бурувгун, чан хьуну дур аварияртту, 14%-рал (380 инсан), чан хьуну бур ххуллурдайсса иширттаву цIунцIияртту хьуми. Мукунма чан хьуну бур (20 инсаннал) ДТП-ттаву оьрмурдацIа хьумигу.
ХьхьичIмур шинах бурувгун ккаккияртту ххуйсса хьунугу, республикалул ххуллурдайсса тагьар нигьачIисса дур.
Госавтоинспекциялул бусласимунийн бувну, чIяруми ДТП-тту хьуну дур щупиртал хьунив ххуллийн буккаву сававну (47%). ЧIявуми ххуллул низамрава бувксса ишру ашкара хьуну бур камерардайхчIин. «НигьачIаву дакъасса ва ххуйсса машиналул ххуллурду» тIисса национал проектрал лагрулий ларгсса шинал республикалий бивхьуну бур 35 камера. ХIакьинусса кьини так ца январь зурул лажиндарай камерардайхчIин ашкара хьуну бур ххуллул низам зия дурсса 21 азарва иш.
Журналистурал суаллахьхьун жавабру дуллай, Шалагиннул мукунма бувсунни хIарчIсса щупир сававну хьусса ДТП-тту 6%-рал чан хьушиву. Ларгсса шинал хIасиллайн бувну низам лирсса 7 зузалал хIакъираву сукку дурну дур уголов дело, ялун личин бувну бур ми къуллугърал ххуттава бувксса 500 иш,14 зузала укьан увну ур даврия. Ххуллурдай мюхчаншиву дузал даврил цIаний уттиния тихунмайгу гуж бувтун зун багьлай бур хасъсса къуллугъирттал зузалтран.
