«Багъдад чуллая бувкIун, Лаккуй читIул кюру бай»

Оьргъиридушру

Халкьуннал ххазиналува

Лакку шаммарду

Урттуву чу тIуркIу тIий,
Чай инава хъюлчай тIий:
Язугъ ми щюлли урттуй,
Чалу мяр-чIан духьурчан.

* * *

Арцу дулай, хъус ласай,
Хъус дулай, къазахъ итай,
Ити уча на бавахь
Вихава къуллугъ буллан.

* * *

Багъдад чуллая бувкIун,
Лаккуй читIул кюру бай,
Лаккуя вайлул хьусса
Ттул мина чув хьувивав.

* * *

Ина оьттун ччуччивуй,
Ва ци оь дуниялли,
Я цинявннан цану хьу,
Я ттунгу цалий дацIу.

* * *

Аман, бавай, гьан бити
ХIавщиял къумаратIув,
Бизар хьуннин балай тIий,
Буччиннин аьтIий бикIан.

* * *

ЯтIул тIутIий, ххуй тIутIий,
Ттухь ина кьарити тIар
На ина кьаритаяр,
Кьаритави дуниял.

* * *

Гъанну чIарав уния
Ялугьлай яавияв,
Архну ура, гьалмагъай,
ДакIниву яуванна.

* * *

Гьала бацIу, ххуйсса душ,
Виринма бикIанххайрав,
Лахъи оьрчIал хъаралу
Хъахъигу лаганссара.

* * *

Лахъундаран лахъуни
Лахъсса зунттуй бишинна,
Лахъуни ув гьалмагъай
Чих уккан къабикIанна.

* * *

Агь, ттул аьзизсса цIукуй,
ЦIарал ччуччин уннахха,
НякIсса ссавний пар-пар тIий,
Нагу ялугьи увну.

* * *

Ялавайгу гьанссара,
Лавайгу учIанссара,
Къавщунийнгу щунссара,
Ттуйна зана хьунссара.

* * *

Зунтту битав, ар ритав,
ЧIурлил барзунттив битав.
Зиризавал вил хъирив
Лаллай лаян къавхьунни.

* * *

Агь, вил чурххал бюхъаву
Чиллардал чинарнияр,
НенттабакIрал тIитIаву
Къалагъайннал чулнияр.

* * *

Цибанссар дунияллул,
На давраннай бунугу,
КIива сунуврал хIави
ХIайранну ливчIун буни.

* * *

Урттувун хъа бивчусса
Ханнал оьру чунияр
Ханну бури качар чурх,
Вищава байгьин хьурча.

* * *

Ккавкссаривла, ссувахъул,
Виврдай щин кьавкьсса кьулла,
Мукун кьаркьун най дури
Хханххираву дикIул дакI.

* * *

Ккавкссаривла, ссурахъал,
ЦIалай нанисса мурлу,
Мукун цIалай най бури
БакIраву тIутIул яру.

* * *

Чинарданул мурхьирал
Мархха аьвну багьния,
Чивух ларгсса авдал дакI
Зана дан шайрив ххал дан.

* * *

ДикIул дакIнил учайва,
Ити, лавмартри, куну,
Байтурман тIутIул яру
Байлаган къабювхъуна.

* * *

Ажаригу бивзунни,
Зунзулчанигу хьунни.
Изу, эшкьилул душман,
Ттул арцул хъазамрая.

* * *

Эшкьи-ччаву дуцайсса
Гулусттаннал цирицин,
Ттул эшкьилул кIушиврул
Ттул чулийннай лархIунни.

* * *

Буттал къатта хъунмари,
Хъунмав хьуннин бикIанна.
Уссу ятIул мусири,
БивчIаннин ябанссара.

* * *

Буттанния буккаяр
БутIурава букканна.
Чил шяравун щар шаяр
Ччисса ивчIан бикIанна.

* * *

Хъазам лахIлахIи чиллуй,
Чуллу лахIлахIи ххаржан,
Чилари ва чиллари,
Чил бакъара, на вилла.

* * *

Уттубивхьу шаний,
Шану къабияй,
Даши дакъа макIлил
ЧантI учин буллай.

* * *

На гьухъану тIатIавав,
ТIутIину кIутIу хьував,
Вайлул лухIи щин хьуну,
Вил хьувух экьигьавав.

* * *

Ссурулккуртта бишайсса
ХъачIниха хъачIнихунъя.
Утти бивтунма бури
КкурчIату чIавахьулттийн.

* * *

На чувра чин бигьассар,
Щил-бунугу учайссар.
Чувшиву дан захIматссар,
Чувнал дакъа къадайссар.

* * *

Агь, ина увсса бавал,
Лякьа ттиркьюкьал шивуй,
Бургъи-зурух ялугьлай,
Ттун эшкьилун увнавав.

* * *

Базу-базулийх лавгри
Базар бяълилул яру,
КьартIанияр кьуртIури
Кьалантрал иттацIантту.

* * *

Бюхттул барзунттал ялтту
Гьава бан бюхъайния,
Зул ларзнил кьанчуллулу
Мина дуван гьавияв.

* * *

ЦIуттуруллущал ччалан –
ЦIумарххала бакъара.
Мурчащал ччалли буккан
ХIуру аьрщи бакъара.

* * *

Була, бавай, чагъана,
Бищунна щюлли къурув:
ОьрчIал кIантту хъарайну
Хъами хъирив бачин бан.

* * *

Балай учай душварал
Балай къачавай бури,
Баламанттугу лавсун,
Щархъайх гьавав къакIулла.

* * *

Дарайлий дарай дакьай,
Дардирдан дарман лякъай,
Дусная личIи хьувкун,
Ттун дуниял цIан лагай.

* * *

Душру цири литIуннав,
Чув-чувнах эшкьи шайсса,
Нава кIилва бивчIаннав
Лавмартнах эшкьи хьусса.

* * *

КIюла магьилул хIави
Вилва ялун бивукун,
Ххявххун лавай билузу,
Ттул хъахъи хъункIул тIутIий.

* * *

ХъункIул тIутIи кьарити,
Банавша ккуччу дува,
На давласиз кьабити,
Давлатлувнал душ буца.

* * *

БакIравува кьакьивуй
БакIраву тIутIул яру,
Ишаннай эшкьи дурну,
Тти чих буруган бувсса.

* * *

Хьхьирил чIанулу чIахIай,
ЧIявуну хъюлчай матIра,
ХъюлчайтIи мурхьирая
ЧIапIив кьатI учайссари.

* * *

Агь, ттул бюхттул барзунттив
Щинну дяркъу бизанттув,
Шикку гъариб ивкIуну,
КъанатIий дур лухччи-ссав.

* * *

Ттул оьрчI-къакъунттул бущий,
Бюхттул зунттул банавшай,
Ттул вищал махсарая,
Къаччанмагу къабивкIрив.

* * *

Зума-зумардайх занай,
Зума-зункIуллай ацIлай,
Ашрапи аьщун бизлай,
На хIайран мабулларда.

* * *

Ва дуниял лахъссари,
Лахъави на вил эшкьи:
Лахъиссари ххуллурду,
Лаява на вил хъирив.

* * *

Лажин чивчумур чарур
Чил чулийнмай бишайсса,
Шяраву ххуймур душри
Чил шяравун щар шайсса.

* * *

Гьунар ялттусса къиргъул
Къурув ххюнчIа къабитай,
Вилва гьунар бухьурча,
Буца на вилва къутайн.

* * *

Гъарив дури ва ттул дакI,
Ятинтал бури яру,
Ятин ччатIухнияргу
Ччиссаннах ялугьисса.

* * *

Хъазам кIукIлу къукъухьхьий,
Бува урчIайнмай гьава,
Ялун гъидайдихьулий
Хъазам цачIу бишинну.

* * *

ЦIимир, язугъри ттул вий,
Чуру мусил нузручIий,
Азаюртуллал зунттай
Ина бурцIил бищурча.

* * *

Ттул вий хъиннува цIимир,
Аьрабусттан хьхьирил оьрчI,
Ясир дарча вил эшкьи
НякI чарил тавханттуву.

* * *

Ссав дурцIусса цIурттава
ЦIуку бугьан итарчан,
На ина бугьавияв,
Шималий чаннацIукуй.

* * *

Язугъ цIубарз бащарчан,
ЦIу ттуруллул бугьарчан,
Язугъ барзунттал бюрни,
Бурандалул бутарчан.

* * *

На балай учивияв,
Баяннан баяйния,
Баяннангу къабавну,
Баянссари душманнан.

* * *

Эшкьилул чагъар къаттай,
Нагу дакIнийн багьайрив,
Чагъаруннийсса сурат
ДакIнияту дуккайрив?

* * *

Къарчигъайлул ччаннай
ХIатIинтрунияр
Вил ччаннай даркьусса
Щурпа дулагъру.

* * *

Чул щуну, хъювун бувтун,
Хъуттал гъулугъин бувну,
Дяркъу щинай шювшуну,
Хьурдай хьуву кьакьан бан.

* * *

Къатта бакъа къазахъ чув,
Къаттагу нава банна,
Хъус дакъа база мискин,
Хъусгу нара дулунна.