Цуппа бусса кIану абад байсса хъамитайпа

[dropcap]Н[/dropcap]а мудангу бикIара, ца шинайсса бухьурчагу, Гуржигьан (Галина) КъараевачIа ккалан ва архIал зун кьисмат хьуминнай дакI мяшнува.

ЧIярур ваниву нава хIайран буллалисса хасият­рал лишанну: бюхттулсса интеллигентшиву, узданшиву, дакIнил чумартшиву.
Ттунма кIулссаксса мутталий дакIний бакъар ва хъамитайпа чаннасса лачакраву – ца дягъу ликканнин цамур лаххан нясивну лякъай. Жагьилсса куявтал, уссил арс, лас, ахиргу, ца акъа-акъасса арс. Амма Аллагьнал чивчумур ссавурданий кьамул буллай бур: тачIав къаккаркссар ванил чанипарсса симан лерщун. Циламур дакIнил къюву цайминнан хьун дуллалисса ххуй-хъиншивурттаву кIучI дурну буссар.


«Гьармудан цу­ппа аркин­сса кIанттай бучIи лякъайсса инсанни, педагог ва насихIатчи хIисаврай», — куну учай в Гуржигьан Къараевал даврил уртакьтурал.


Ппу жазаил увну, буттал лажин къаккарккунма хъунма хьусса бухьурчагу, бакъар ва я паччахIлугърайнсса, я тани­сса паччахIтурайнсса сситтул бувцIуну. ХIакьсса патриот бур. Му хасият тарбия дуллай буссар хъун хъанахъисса никиравугу.

Гуржигьан Къараева кулпатращал.
Лас, МВД-лул полковник Зайнуттин Аьбдуллаев

РяхцIалунниха лирчусса шинну шагьрулий дарчагу, дакIнивугу, оьтту-ттурчIавугу ванища бювхъуну бур ядан миллатрал аслийшивугу, яхI ва къириятгу.
Бувну бур Гуржигьан Къараева 1935 шинал Хъурхърал шяраву. Революциялийн къаршисса пикрирду ппив буллалимари тIий, ппу дуснакь увсса чIумал, ванин диркIун дур дурагу кIира шин. Ппу аьщун изан ккаккан увну ур. 1956 шинал реабилитировать увну ур. Ванил ниттин, зун­ттаву гъурбатрай ливчIсса къабардин миллатрал хъамитайпалун, багьну бур мукьва оьрчI цилалу хъуни буллан.

ТОКС-рал кьюкьлущал Хъун дяъвилул гьурттучитурал щахъаннил ялтту буккан най

Хъурхърал школалий 7 класс къуртал бувну махъ Гуржигьан лавайми классирттавун занан бивкIун бур Гъумучиял школалийн.
Школа къуртал байхту ванил хьхьичI бивкIун бур кIива ххуллу — гихунмай дуклан ягу колхозраву зун. Ванийн бияннин шярава цавагу душ лавгун къабивкIун бур шагьрулийн дуклан. Та заманнай щар къавхьусса душ кьатIушав лагаву зунттал халкьуннан салихIсса ишну чIалай къабивкIссар. Цукуннугу, ниттищал маз лявкъуну, лавгун бур дуклан.

Муксса гъирарай бивкIун бурхха ккалан, дакIнийн бутлай бур, цуппагу, шама цайми оьрчIгу шярава шагьрулийн бияннин щалва ххуллийх рирщу гъаравух хъус духхай машиналий бувкIссару тIий. Хьхьувай вокзалданийн бивну, чун гьантIиссарив къакIулну, баябанну ливчIун бивкIун бур. Микку цищала ца классраву дуклай ивкIсса АхIмад Ссунгъуровлул маслихIат бувну бур Хъаннил институтравун бу­ххан. «Оьрус миллатрал вахтершал хьунабавкьунав на, га ттухва ялугьлай бивкIсса кунма», — тIий, дакIнийн бутлай бур Гуржигьан.

Га кьини махъва-махъсса группалул экзаменну дуллай лявкъуну, чун дуклан бухханссаривгу къакIулну ливчIун бивкIун, ахиргу тарихрал факультетрайн экзаменну дуллуну дур.
Институтравугу хьхьичIунну дуклай, курсрал комсоргну зий, жяматийсса иширттавухгу мудан чялишну бивкIун бур. Дуккаву къуртал дайхту ДР-лул КIулшиву дулаврил министерствалул тIайла бувккун бур Парауллал арулла шинал школалийн зун. КIира шинава, кулпатрал ишру хьхьичIун багьну, бивзун бур Гуржиянавун. Тикку Болниси тIисса шяраву детсадрал тарбиячину зун бивкIун бур. Шинава махъунмай Да­гъусттаннайн зана хьуну, зий байбивхьуну бур цал МахIачкъала шагьрулул 11-мур школалий, яла 34-мур школалий тарихрал дарсру дихьлай. Цаппара шиннардива бивтун бур завучну. Му даврийгу дурну дур 15 шин.
Галина Къараевал даврицIун дархIусса юбилейрдал авадансса дур гьашинусса шин. Цинна бартлаглай дур 85 шин. ХхюцIаллий ххюра шин хъанай дур ванил школалий Боевой славалул музей сакин бувну. ХхюцIалла шин хъанай дур ванил сакин дурсса ТОКС-рал кьюкьлунгу. Къараева хIакьинусса кьининийнгу каялувшиву дуллайнма бур ТОКС-рал кьюкьлуй.

«Гьармудан цуппа аьркин­сса кIанттай бучIи лякъайсса инсанни, педагог ва насихIатчи хIисаврай», — куну учай ванил даврил уртакьтурал.
Гьашину зувира шин там хъанай дур Дагъусттаннай аьрщи сукку хьуну. Та базилух Гуржигьан цила хушрай лавгун бур апатIрахьхьун биривсса районнаясса оьрчIру бигьалаган бувцуну Костромуллал областьрал Шарье шагьрулийн. ДР-лул делегациялувух лавгун бур Казбекуллал райондалийн чачаннал ва яруссаннал дянивсса къалма­къал лещан дан, хъаннил делегациялувух леххаврий лавгун бур, Къизлардайн ва Первомайскалийн боевиктал ххявхсса чIумал. ТОКС-рал кьюкьлущал ва дуклаки оьрчIал нитти-буттахъащал ца хьхьу-кьини бавтIун бур къачагътал ххявхсса районнаясса лихъачалтрансса кумаг.

Оьрмулул 80 шин шайхту ва буссия даврия гьан дакIний. Амма итабакьайссарив школалул каялувчитурал цIанихсса педагог, багьа бакъасса тарбиячи ва насихIатчи. Цуппа зузисса школалул микрорайондалий ялапар хъанахъисса 197 Хъун дяъвилул ветераннаха багьайссаксса хIурмат бувссар Гуржигьан Къараевал каялувшиндаралусса дуклаки оьрчIал, гьар шинал Ватан дуруччултрал ва Ххувшаврил байрандалийн тIутIал кацIурдищал ва ссайгъатирттащал лагайссия. Цуксса хIайпнугу, хIакьинусса кьининийн минная цаягу ливчIун акъар.

Амма, дуклаки оьрчIругу бувцуну, Гуржигьан хIакьинугу лагайссар миннал щахъаннил ялтту буккан.
Къараевал сипталий дайдирхьуну, яла цIакь хьусса аьдатру школалий цаймигу ду­ссар. Гьарца цIусса дуккаврил шин дайдихьулий насихIатрал мукъуйну хьунабакьайссар дахьва зун бувкIсса учительтал. Гьарца ЦIусса шинал хьунийн барча байссар юбилейрду дусса учительтал, оьрчIругу бувцуну, барчаллагь учин лагайссар даву кьариртсса учительтурахь.

Луглай ляхълай бакъар сайки мубараксса ва хъамитайпалул марцIсса захIматрая бусансса ва барчаллагь учинсса махъру. ЧIа тIий буру цIуллушиву, оьрчIал оьрчIаясса тирхханну.

Зулайхат Тахакьаева