ИхIсандалул ххуллий

2011 шиная шинмай жула республикалий захIматсса тагьарданувун багьсса, ахIвал-хIал кIюласса кулпатирттан ка-кумаг буллалисса чялишсса давуртту дачин дурну буссар

«Инсан» тIисса ихIсандалул фонд. Ва фондрал хъунмасса хIарачат буллай бур дуки-хIачIиялул, лаххи-ликкиялул, медициналул кумагру аьркин­сса миски-гъаривсса кулпатирттал чIарав бацIлай. Фондрай мукунна зий дур «Лекьавайсса къатри» тIисса программагу.


Имара Саидова
[dropcap]Н[/dropcap]игьачIийсса тагьар дусса къатраву ялапар хъанахъисса ахIвал-хIал кIюласса кулпатир­ттан дуллай бур цIусса къатри. Вай гьантрай «Инсан» фондрал цIусса къатри дурну, талихIрайн буккан бунни Ккуллал райондалийсса Ваччиял шяравусса Аьвдурашидовхъал кулпат.

КIицI лаганну «Инсан» ихIсандалул фондрал уттинингу Ккуллал райондалий ялапар хъанахъисса нину-ппу бакъа ливчIсса оьрчIан, ахIвал-хIал кIюласса кулпатирттан таман­сса кумагру бувшиву.

Утти ва фондрал дурсса цIусса къатравун бивзунни Ваччиял шяраву ялапар хъана­хъисса ятинсса оьрчIру ябуллалисса Аьвдурашидова Фиалкал кулпат. Вай къатри тапшур дан бувкIун бия «Инсан» фонд­рал хъунама директор Расул АхIмадов, ванал хъиривчу Рамазан Жаватханов, вайннал кумагчитал, Ккуллал райондалул имам КьурамахIаммад МахIаммадов, Ваччиял шяраваллил администратор Арсен МахIаммадов.
КIинтнил бявкъусса гьант­рай цIуну дурсса къатравун бизан бувсса Аьвдурашидовхъал кулпат хIат-хIисав дакъа барчаллагьрай бия цинявппагу цала чIарав бавцIусса, ка-кумаг був­сса инсантурайн.