ЦIусса шинал байрандалул хьунийн жула республикалул хъун шагьрулий цIу буккан бувунни Хъун майдан, хьунни муницIунсса хъуннасса шадлугъгу. 

Ссутнил лачIлачIисса гъаравухгу, мурчавухгу, хьхьу-кьини дакъа, хъахъи-някIсса «спецформардавусса» зузалт, битIикьукьулт кунма, щуруй бия. Давуртту нани­ссаксса хIаллай шагьрулул администрациялул, жула республикалий цIа ларгсса спортсментал, политиктал, жяматийсса ишккаккултгу гьурттуну, жура-журасса акцияртту дуруна.

Залму АьбдурахIманова
Декабрьданул ахирданий, республикалул районнал каялувчиталгу гьурттуну, хъуннасса шадлугъгу, шагьрулул оьрчIан Хъун Елкалул байрангу дурну, Хъун майдан, ятIул лиссугу кьуркьуну, тIивтIуна. Гара кьинияв, хъиривмур кьинияв, аваза гьаз хьуна социал сетирдаву, майданнивсса диялдакъашивурттая бусласисса комментарияртту дарчуна.

ЦIусса шин дуркIун шамилчинмур кьини, социал сетирдайсса хавардансса жавабран, Инстаграмрал лажиндарай шагьрулул бакIчи Салман Дадаевлулгу, майданнив давур­тту нани дурну бивкIсса «Армада» строительтурал компаниялул вакилналгу бувчIин бавур­тту дуруна. Шагьрулул бакIчинал бусаврийну, майдан бакьин буллалисса давуртту уттигу нантIий дусса дур инттунин.

«Жун кIулли майданнив ттигу чIярусса давуртту дан душиву. Бюхъайссияв жу щаллу хьунгу, агарда майдан ппив бувну бакьин буллай сукку хьу­сса чIумал гивусса щинал бургъурду, токрал, коммуникациялул ххаллал хIат-хIисав дакъа­сса мюрш давуртту ялун къалирчуссания. Хъуннасса чIун харж хьуна майдандалул лувсса, аьрщаравусса, давурттан.

Байран гъан хъанахъийкун, жунгу ччан къабивкIуна шинал мутталий ялугьлай бивкIсса жула мюрщулт Хъун Елкалия махIрум бан», — тIий ур мэр цала лажиндарай.