ЦIуллу-сагъшивруцIунсса маслихIатру

Лимон хъанай дур щаллусса шинал мутталий дикIайсса ахъулссаннувасса ца. Му сивсуну ккалли дуван бю­хълай бур дунияллий га яла мюнпат бумур ахъулссаннун.

Инсаннал цIуллушиврун лимон цуксса хъинсса дуссарив кIукъакIулсса акъахьунссар. Мунийн бувну, лимондалуву дусса мюнпатсса затру кIицI лаглагисса, ссая-цукун хъинссарив бусласисса бизарсса чичрурду къадулланну. Аьвзалзаманная шинмай лимондалуйн «абадшиврул гьивч», мукунма «мусил гьивч» учай­сса бивкIун бур. Мунияту зул холодильникраву лимон дакъасса чIун дикIан къааьркинссар.
ЛимондалуцIун бавхIусса ичIува ишла бувансса вай ца-кIива маслихIатгу чIяву къахьунссар тIий буру.

* * *
Гъинттул, интту бакъасса, кIинттулгума ук-тук личайсса битIикьукьри бакъа хьунтIиссар, щях, плинтусирттайх ва ми заназисса цаймигу кIанттурдайх лимондалул сок дуккарча.

* * *
Лимондалия ххишаласса сок дуккантIиссар, му, духъан хьхьичI, 5 минутIрайсса кIирисса щинаву диширча.

* * *
Дукралун ишла дуллалисса ахънилсса цIан къалаганшиврул, шахьлахьийни миннуйн ца чяйлул къуса лимондалул дутIин аьркинссар.

* * *
Балугъ ягу дикI духъла­хъийни, кьункьал хьусса тахта лимондалул бигьанна марцI дувантIиссар. Му лимондалул сокрал кIунтIру бувтIуну губкалух, яла укуннасса щинай шюшира.

* * *
Накьлил урттул, ахъулссаннуя дурсса салатIирттал, ссуп­ралий дишин дурхъсса ахъул­ссаннул диц-куц, цIай хъунма­сса хIаллай личIантIиссар, миннуйн лимондалул сокрал пурх учирча.

* * *
КIяласса янна шюшланнин, ми лимондалул сок ва сода бивчусса щинаву 30 минутIрайсса диртун, яла зура шюшайсса куццуй шюширча, пар-пар тIий дикIантIиссар.

* * *
Гьухъая хьусса ттангъри марцI дувангу кумаг хьунтIиссар лимондалул сокрая. Шюшлан хьхьичI, ларсун цара-цану лимондалул сок ва щин, миннуй ттангъри дусса кIанттурду атил бувну, 15-20 минутIравун зура шюшайсса кьяйдалий шюшара янна.

* * *
Янналий хьусса хъатрулул, сситтул ттангъри гьан дуван ишла бувара мюршсса цIу ва лимондалул сок хIала дурну бувсса букьвасса паста.

* * *
Порошокращал архIал янна шюшай машиналувун ца лимондалул сок дутIирча, порошокрал гуж кIилий ххи хьунтIиссар, янналуцIагу тIааьнсса кьанкь дикIантIиссар.

* * *
Шахьлахьисса ппиринж кувнницIун кув къалачIун­тIиссар, ми щаращисса щинавун лимондалул сокрал къуса дутIирча.

* * *
Найрал кьацI увкусса кIанайх, цIуцIаву хьхьара дуван, лимондалул сок дурккун хъинссар.

* * *
Каний ххарци ягу хъун да­къасса щаву хьусса чIумал, дезинфекция дувансса цамур зат канилу дакъани, ишла дувара лимон.
* * *
Каруннийсса михьру цIакь буваншиврул кару 5 минутIрайсса дишара дачIи лимондалул сокгу дуртIусса 200 мл. кIирисса щинаву (духIан шайсса температуралул).

* * *
Каруннийсса ттангъри гьан дуван дуккира каруннийх лимондалул сок, ца-кIира минутIравун шюшара кару, ссахIвангу був­ккун, гъилисса щинай.

* * *
Лажиндарал бурчу аьркин дакъасса чапалшивруцIа марцI буван, мунил жагьилшиву ва цIай буруччин хьунтIиссар, лимондалул кIунтIругу бувтIусса щинай лажин шюшларча.

* * *
Синтту дуруччиншиврул, кариес къахьуншиврул, ккар­ччал ялтту къат къадакьиншиврул, бюхъавай, дукра дуркутари кьацI вилаглагияра лимондалул кIунтIру бивчусса щинай. Амма ахирданий марцIсса щинайгу вилагияра кьацI, лимондалул сок­рал зула ккарччал эмаль зия къадуван.

* * *
Сси къабагьайсса муххая дурмур цIай-цIайтIи дуван, ххуйну марцI дуван хьунтIиссар, сода ва лимондалул сок хIала дурну, миннуй ссуку дурну, хIатта лимондалул ххарахIала цурдалу муххайх дурккунгума.

* * *
УссацIасса тIааьн дакъасса кьанкь гьантIиссар, хьхьувайния кIюрххилнин мивун лимондалул ккиртту бичирча.

* * *
Чяйлул къуса ницIал, ца-кIива кIунтI лимондалул сокрал хIала бувсса гъилисса щинал стакан гьарца кIюрххил хIачIлачIаву – хъинсса аьдатри.

* * *
ЦIанасса, марцIсса, ххуйсса дуки-хIачIия чансса чIумал, оьтту токсиннацIа марцI буван кумаг хьунтIиссар лимондалул сок хIала дурсса щиная.

* * *
Холодильникравасса тIааьн дакъасса кьанкь гьантIиссар, мунивух лимондалул сокрай атил дурсса губка дуккарча.

* * *
Микроволновка бигьану марцI хьунтIиссар, лимондалул сокрал кIунтIру бувтIусса щинащалсса кIичIу бивхьуну, 3-5 минутIрайсса лахъсса градусирттай лавхъун, яла зува бувайсса куццуй марцI буварча.

* * *
Кухнилийсса раковина дур ичIура яла чIяруну ишла дуваймур, яла чIяруну чапал шаймур зат. Му зура шюшайсса куццуй шюршуну махъ, дутIияра мивун содагу бивчусса лимондалул сок, 10 минутIрайсса диртун, ялун кIирисса щин дутIара.

* * *
Грильданий дагъ буллалисса балугъ лакъачIун ва мунил тIин-тIааьн ххуй буван кумаг хьунтIиссар грильданул решеткалий бувсса лимондалул «шануя» (суратрай).

* * *
Пюрундалул тIахIни-кIичIулул ялтту чIун-чIумуй дакьайсса цIансса къат, чяйлуя дикIу, ххит-чапалшиврия дикIу, дакъа хьуну, тIахIни цIай-цIай тIунтIиссар, мунил вивх ва ялтту лимондалул ххарахIала дуккарча.

* * *
КIяласса кроссовкарду марцI-кIяла хьунтIиссар, янна шюшай порошок, лимондалул сок ва ссирка хIала дурну шюширча.

* * *
Аьгъусса ягълав бигьану марцI хьунтIиссар, мяш бакъа цIивун щусса лимондалул ххарахIалттух му ссуку буварча.

* * *
Ххуйну кьакьан бувсса лимондалул ккирттарацIух хъинну цIу лачIайссар. Му ишла буван бюхъантIиссар кIачлилу, каминдалуву цIу лахъан дуван. ЦIарацIун гьава тIааьнсса кьункьалгу буцIинтIиссар.

* * *
ДакI ларай нанисса куннасса тагьар дуний, кьацIливу лимондалул касак бихьирча, хIал къулай хьунтIиссар.

ХIадур бувссар Бадрижамал Аьлиевал

Читайте также: