Лахъа-хъун бунни хьхьичIунну дуклакими

[dropcap]Ш[/dropcap]инал ахирданий ЦIуссалакрал райондалий аьдатравун багьну бур мусил медалданий школа къуртал бувсса,

хьхьичIунну дуклакисса оьрчIру лахъа-хъун буллалаву. Гьашинугу ЦIуссалакрал райондалул бакIчи ХIажи Айдиев дуклаки оьрчIащал хьунаавкьунни ЦIуминалийсса Гьамиящиял школалий. ­


Имара Саидова
[dropcap]М[/dropcap]ажлис тIивтIуна ЦIу­сса­­лакрал райондалул КIул­шивуртту дулаврил управлениялул хъунмур Светлана Къудаевал.
ОьрчIру барча бувна ва вайннал нитти-буттахъахь барчаллагь куна ХIажи Айдиевлул.
— Шинал ахирданий жува, дурмунил хIасиллугу дурну, гихуннай дантIимунил планнугу дичлан бикIару. Ларгсса шин райондалул дуклаки оьрчIан дуккавриву ва школалул иширттаву дурсса ххуйсса ккаккиярттайну дакIний лирчIунни.

ОьрчIал оьрмулуву ва кьини мудангу ххарисса асардайну дакIний личIантIиссар. Умуд бур цIусса шиналгу вайннуяргу хьхьичIунсса ккаккияртту хьун данссар тIисса. На мудангу хIадурссара хьхьичIунну дук­лакисса оьрчIал чIарав ацIан. ТIайлабацIу баннав, оьрчIрув! — увкуна ХIажи Айдиевлул цала ихтилатраву.

Хъирив райондалул бакI­чинал дуруна дакIний личIансса бахшишру хьхьичIунсса хIа­силлай дуклай бивкIсса байбихьулул ва лавайми классирттал 196 оьрчIан. Мукунма вава мажлисрай 2018-2019-ку шиннардий мусил медаллай школа къуртал бувсса 20 выпускникнан дуллунни мусил ссятру. Республикалул олимпиадарттай хьхьичIунсса ккаккияртту дурсса 17 оьрчIангу дуллуна ХIурматрал грамотар­тту ва бахшишру.
Дуклаки оьрчIру барча буллалисса ихтилатру бувна райондалул бакIчинал хъиривчутал Аьли Исрапиловлул, ХIажи ХIажиевлул ва шяраваллал бакIчитурал.