Росгвардиялул Ухссавнил Ккавкказуллал округрал аьралитурал, Къизлардал администрациялул ва Агьалинал социал масъаларттаха зузисса
шагьрулул центрданул вакилтурал барча дунни ЦIусса шинал байран Хъунмасса Буттал кIанттул цIанийсса дяъвилул ветерантурахь ва къинттуллух захIмат буллай бивкIминнахь.
Росгвардиялул аьралитурал щала цала бригадалул цIания ветерантуран бахшишругу дунни.
-Ххирасса ветерантал, дакIнихтунусса барчаллагь зун дунияллийсса дакьаврил ва халкьуннал тархъаншиврул цIаний талай бивкIун тIий. Жу махъ буллай буру, зуяту эбрат ласлай, лайкьну оьрму бутлан ва зун, — увкунни ОМОН-лул миномет батареялул командир, хъунама лейтенант Дмитрий Буженкол.
Хъирив аьралитал лавгунни «Ветеран» клубравун ва барча бунни захIматрал ветерантурая сакин хьусса вокалданул группа. Вайнналгу ккаккан дунни хъамаллуран ххаллилсса концерт.
Аьралитал бувкIунни Дякъилттаттащал
Росгвардиялул Ухссавнил Ккавкказуллал округрал ОМОН-лул аьралитурал тяхъасса байран дунни нину-ппу бакъасса оьрчIал школа-интернатрай.
Вай бувкIун бия оьрчIахь ЦIусса шинал барча дан, Дякъилттаттагу увцуну. Интернатрал оьрчIал бувккунни Дякъилттаттахь шеърирду, увкунни балайрду. Ваналгу ххари бунни оьрчIру, нацIу-кьацIулул кьуцуртту бахшиш бувну. ОьрчIру барча буллалисса ихтилат бунни хъунама лейтенант Артем Сулоевлул. Школа-интернатрал директор Малик ХIажиевлул барчаллагь увкунни Росгвардиялул зузалтрахь, оьрчIан ххаллилсса байран дурну сакин даврихлу.
КадетътурачIа хъамалу
Дагъусттаннал Росгвардиялул управлениялул «Ястреб» тIисса СОБР-ал зузалт биюнни цала аякьалийн лавсъсса М. ХIажиевлул цIанийсса Кадетътурал хьхьирил школа-интернатрайн. Вайннал барча бунни оьрчIру кIилчинмур дуккаврил четверть къуртал шаврищал ва ялун нанисса ЦIусса шинащал, дуллунни бахшишру.
-Щак бакъар зу, уттиния тихунмайгу, ххуйну дуклай, зула нину-ппугу, учительталгу ххари булланшиврийн, школа къуртал бувну махъ зул дянив жула кьюкьравун бучIанссагу лякъиншиврийн, — увкунни СОБР-ал командирнал хъиривчу, полициялул подполковник АхIмад АхIмадовлул.
Кадетътурал школалул каялувчитурал барчаллагь увкунни аьралитурахь оьрчIаха дуллалисса аякьалухлу. Шиккува кIицI бан, ЦIусса шинал байрандалуцIун дархIусса чирилул акциялул лагрулий «Ястреб» СОБР-ал зузалт биюнни аьпалул хьусса зузалтрал кулпатирттачIангу, бунни арцуйнусса кумаг, оьрчIан дуллунни бахшишру.
ХIадур бувссар
А. Аьбдуллаевал
