[dropcap]У[/dropcap]хссавнил Ккавкказуллал республикарттал миллатирттал театрдал дянив кувннал кувнначIансса гастроллал агьамшиву ялу-ялун хъун хъанай дур, миннуйну,

тамашачитурал аудиториягу гьарза-гьарта хъанай, театрдал коллективрдал кувннал кувннащалсса дусшиврул ва уртакьшиврул арардугу цIакь хъанай дур.

[dropcap]Ч[/dropcap]Iаххувсса республикарттайн уртакьшиврийсса гастроллай А. Къапиевлул цIанийсса Лакрал паччахIлугърал драмалул ва музыкалул театр занай буссар 2012 шиная шинмай. Театр сайки шан-шамийлва гастроллай лавгссар Владикавказ, Астрахань, Нальчик, Баксан, Пятигорск, Грозный ва Майкоп шагьрурдайн.

Ттигъаннурив хъунмасса тIайлабацIулущал зана хьунни Элиста шагьрулия.
Къалмукьнал тамашачитуран ккаккан бунни театрданул репертуардануву агьамсса кIану бугьлагьисса шанма спектакль: Шекспирдул «Гамлет» (Болгарнал режиссер Богдан Петканиннул бивхьусса); Апанни Къапиевлул аьра­ли чичрурду гьануну ларсъсса театрал поэма «Духкъалагайсса макь» (Ислам Казиевлул бивхьусса) ва А. Усачевлул оьрчIансса спектакль «Айболит» (режиссер Аслан МахIаммадов).

Гастроллал цалчинсса кьини Къалмукьнаву хьунни республикалул паччахIлугърал телерадиокомпаниярттал ва кказитирттал журналистуращалсса пресс-конференция. Муний гьуртту хьунни: театрданул директор МахIаммад ХIусайнов; хъунама режиссер Аслан МахIаммадов ва артистал Саният Рамазанова, Артур Абачараев, Зульфия Архилаева.

Лакрал театрданул Къалмукьнавунсса цалчинсса аьрххи хъанай бухьувкун, тайннал журналистал цIухлай бия театрданул тарихрая, репертуардания.
ТIивтIуна гастроллу «Гамлет» спектакльданийну. Хъамаллурахь чабувкру чин сахIналийн бувккуна Къалмукьнал театрданул директор Виктор Хаптаханов ва Къалмукьнал культуралул ва туризмалул министрнал хъиривчу Николай Санджиев.

Николай Санджиевлул Лакрал театрданун дуллунни Министерствалул чулухасса ХIурматрал грамота.
Шанмагу спектакль кьамул бунни лавайсса даражалий. Спектакллая махъ, барчаллагьрай хъямала багьлай, суратру ришлай, актертурая ябуцан къашавай бия.

Гастроллу къуртал хьуну махъ, Лакрал театрданул коллективрахь барчаллагь тIий, Къалмукь респуб­ликалул Театрал ишккаккултрал союзрал хъунмур Татьяна Михеевал буллунни Барчаллагьрал ча­гъар, Виктор Хаптахановлулгу дуллунни ХIурматрал грамота.

Лакрал театрданул директор МахIаммад ХIусайновлул барчаллагь увкуна Къалмукьнал Оьрус­нал драмалул ва комедиялул коллективрахь, гастроллу лавайсса даражалий сакин бан­сса кабакьаврихлу ва тамашачитурахь хIурматрайсса хьунабакьаврихлу.

КIира кьинисса гастроллая махъ, хьхьувай ххуллийн букканнин, артистуран ххуллухъиндарансса ссупра тIивтIуна Виктор Хаптахановлул ва Къалмукьнавусса Дагъусттаннал диаспоралул вакил ХIалимат Кьадиаьлиевал.