Усругу зия къахьун, ччаннугу атил къахьун
КIину кIи къадикIайсса, буварчангума марххала, хъиривва бавссуну нанисса, кIичIиртту кьавкьсса чIун нажагь дакъа къадикIайсса жула кIанттай къачIивисса иш бур ччанну атил хьун къабитаву ва усру ядаву,
хаснува кучарду щинал гьузи лавхъсса чIумал.
Бусанну, ичIура думур ишла дурну, усру хъатрулия дуруччинсса цаппара кьяйдардая.
* * *
ДакIний битияра, усру хъатрулия дуруччин ишла дувай затру, ттучандалиясса дикIу, зура дурсса дикIу, кьатIув бувккун нанисса ппурттуву дуккан къабавцIунма, шаппату буккан мадара чIун лирчIсса чIумалла дуккан аьркинссар, ми уссавун дикIайкун дюххансса ва щинайн къаршисса къат дакьинсса чIун диял хьуншиврул. Хъиннува хъинссар укунсса даву усру кIюрххил лаххан хьхьурайра дурну.
* * *
Дуккаймур чара бакъа кьаркьсса, марцIсса уссайх дуккияра.
* * *
Лакрал ягу бювчIусса бурчул усру хъатрулия дуруччин кумаг хьунтIиссар аптекирттай кIапIикIирттан дахлахисса вазелиндалия. Дуккияра ми уссал бювчIуми кIанттурдайх ва дурурххусса ягу лачIун дурсса щару бусса кIанттурдайх, яла гъили дувара, фен дурган дурну. Гъилишиврий дарцIлацIисса вазелин гьарца кIанттайн саргъунну диянтIиссар.
* * *
Кьянкьасса, ганзсса бурчул уссайх дуккияра касторданул аьгъушиву. Ми дукканнин хьхьичI, кIиз кьакьан бувайсса фен уссал вив дурган дурну, усру гъили дувара, яла дуккияра аьгъушиву. Ми дурккун махъ усру гъилисса, кьавкьсса кIанай дитан аьркинссар цаппарасса ссятурдий. Яла лирчIмур мугъаятну аццух дукьияра.
* * *
Касторданул аьгъушиврул парафиндалущал цачIунугу дуруччинтIиссар усру хъатрулия, амма ва кьяйда бакьайссар так бурчул уссан. Парафиндалул 1 чяйлул къуса мюршну ссуссулийх дурккун, касторданул аьгъушиврущал хIала дурну, ми дусса тIахIни щаращисса щинащалсса кIункIурдуву дирхьуну, цIарай дитан аьркинссар парафин бассаннин. Гъилину дунура ми дуккан аьркинссар уссайх, амма кIюласса къат хьунну. Акъарив, къат ганз хьурча, уссал диц-куц зия хьунтIиссар ва бурчу кьянкьа хьунтIиссар.
* * *
Усру хъатрулия хъинну ххуйну дуруччайссар къузурил (гусь) аьгъушиврул. Ва кьяйда ишла дувайсса диркIссар совет заманнул альпинистътурал. Аьгъушиврул мукьва бутIул шанма бутIа, хъандалул шанма бутIул ца бутIа ва касторданул аьгъушиврул шанма бутIул ца бутIа хIала бувну, лагьсса цIарай дарцIаннин гъили дурну, дуккан аьркинссар гъили дурсса уссайх.
* * *
Усру хъатрулия дуруччавриву кумаг шайссар яттил аьгъушивриягу. Амма ми цирдалу ишла дуварча, тIааьн дакъасса кьанкь дикIантIиссар. Мунияту миннувух хIала дуван аьркинссар касторданул ва туртул аьгъушиву (аптекирттай дуссар). Яттил аьгъушиврул 70 грамм дарцIан дурну, миннувух микссара туртул аьгъушиву ва 15 грамм касторданул аьгъушиврул хIала дурну, гъилину дунура уссайх дуккан аьркинссар.
* * *
Хъан ягу майлул чирахъ лавсун, уссайх бувккун, фен дурган дурну, усру гъили лаган дурну, яла, кьаркьсса кIукIлусса ацци дуклай, ми дючIангу дувара.
* * *
Хъамамабитаванни кьатIату шаппайн бучIайхтува, курчIил къавхьуну, усру най дунура марцI дурну, кьакьан дурну, тиннай дукьаван, цаппарава хIаллавун миннуйх дугъаймургу дугъан.
* * *
Атил хьусса усру къабучIиссар батареялучIа кьакьан дуллан. Вив кказитругу бавкьуну, кьавкьсса гъилисса кIанай дишара усру цирда кьакьан.
Гьава хъавтусса чIумал хъиннува хъинссар уссал кIива чут бухьурча: ца кьини – царай, гамур кьини – гайми лахлан, ми цайнура цирда кьакьавансса чIун дикIаваншиврул.
Бякъакъинну, ччанну атил къахьунну къуццу тIутIияра.
ХIадур бувссар
Бадрижамал Аьлиевал