[dropcap]Н[/dropcap]оябрь зурул 27-нний Дагъусттаннал региондалийсса «Единая Россия» партиялул председатель Дмитрий Медведевлул кьамул бай
къатлуву агьалинащал хьунаавкьунни АьФ-лул ПаччахIлугърал Думалул депутат Аьвдулмажид МахIрамов.
МахIачкъалалив ялапар хъанахъисса Маржанат Арсланова бувкIун бия цилла къатри дурсса аьрщарал заллушиву дуллалисса ихтиярду тIайла дацIан даврил масъалалул ялув. Ванил хIакъираву маслихIат ккавккунни, шагьрулул прокуратуралийн аьрза буллуну, аьрщи цийра дацIан дансса.
Ккуллал райондалий ялапар хъанахъисса Жума Жалилова бувкIун бия цила арснан даву лякъин кумаг ба тIий. Ванил бувсунни филологсса цила арс, харж чIивисса бушиврийн бувну, учительну зий акъашиву. МахIрамовлул кIицI лавгунни шяраваллил кIанттурдай учительтал биял хъанай бакъашивруцIун бавхIусса масъаларттащал цува ччя-ччяни хьунаакьайшиву.
— Хъиривмур шиная байбивхьуну, мукьазаруннийн бивсса инсантураща бюхъантIиссар, «Земский учитель» тIисса программалувух гьуртту хьуну, шяраваллавусса школарттай зун лавгун, миллион арцул ласун. Жуща бюхъанссар, му программалувух вил арсгу гьуртту хьун увну, Ккуллал райондалийсса ца школалийн зун тIайла уккан, — увкунни МахIрамовлул.
ЦIуллу-сагъшиврул мушакъатшиву дусса 2-мур группа ласун кумаг баву тIалав буллай бувкIун бия МахIачкъалалиясса Гулишат Дамаданова. Ванил бувсунни, лахъи ларгсса бронхит дуну, цIуллу-сагъшиврул тагьар хьхьарану душиву ва мунийн бувну муданмасса мушакъатшиврул группа ласунсса кумаг аьркинну бушиву. Депутатнал бувчIин бунни мушакъатшиврул группа багьай бувайсса комиссиялул цинна ккаккан дурсса низам душиву. Ванил хIакъиравугу бюрорал каялувчинахь бюхъайсса кумаг баву тIалав буллалисса аьрза тIайла бувккунни.
ХIадур бувссар
Имара Саидовал
