Цалчин ххал бивгьунни террорданул иширттавун Дагъус­ттаннал балугъравун къабивсса оьрчI-бакI кIункIу баврийн къарши буккаврил масъала.

Масъалалул агьамшиву кIицI дуллай, региондалул каялувчинал бувсунни му давриву къулагъас дуллан аьркиншиву оьрчIащалсса даврих, хаснува Сириянава ва Иракьнава дяъвилул иширттава зана хьуминнах, мукунма балугъравун къабивминнал иширттал комиссиярттай сияхIрайн лавсминнал давурттах.

Владимир Васильевлул тIи­мунийну, хьхьичIра-хьхьичI къулагъасрайн ласун аьркинссар тарбиялул ва профилактикалул давуртту.
Му ххуллий дуллалисса давурттая гьартану бувсунни ДР-лул виваллил иширттал министр­нал буржру чIумуйсса бартбигьлагьима Дмитрий Гутырял. Мунал тIимунийну, республикалул дуккаврил идарарттай (колледжирттаву, университетирттаву) сакин бувну бур экстремистшиврул идеологиялийн къарши бу­ккаврил, ярагъ ва наркотикру ба­ххаврийн къарши буккаврил зузи группартту. Хъунмур къулагъас дуллай бур Сириянавусса ва Иракьнавусса кулпатирттава­сса оьрчI-бакI цалва кулпатирттавун зана баврил давурттах.

ДР-лул вице-премьер – ду­ккаврил ва элмулул министр Уммупазил Оьмаровал бувсунни цила каялувшиврийсса идаралул дуллалисса давурттаяту.
ДР-лул жагьилтурал ишир­ттал министрнал кIанайма Сиражуттин ХIалимовлул бувсунни жагьилтуращал дуллали­сса давурттал хIакъираву. Мунал тIимунийну, вузирдаву ва колледжирттаву буллай бур «Паракьатсса Дагъусттан, «Дагъусттанлувнал яхI-къириятрал кодекс», «НигьачIаву дакъасса интернет» тIисса ва цаймигу темардал семинарду. Миннул мурад бур жагьилтураву информациялиясса нигьачIаву духлаган даву ва радикал иширттал профилактика. Мукуннасса давуртту дуллай бур чил билаятирттая бувкIсса студентътуращалгу.

Яла махъ лавхъунни ДР-лул БакIчинал маслихIатчи, ДР-лийсса АТК-лул жаваблувсса секретарь ТIалхIат Файзуллаевлул. Мунал ихтилат бунни мува ххуллий паччахIлугърал къуллугъчитуращал дуллалисса давурттал хIакъираву.
Хъирив ххал бивгьунни властрал органнал АьФ-лий терроризмалул идеологиялийн къаршисса давурттал план биттур даврил хIасиллал масъала. Мунил хIакъираву махъ лавхъунни республикалул информатизациялул, дахIаврил ва агьалинан­сса коммуникациярттал министр Сергей Снегиревлул.
Цалла дурсса давурттая бувсунни ДР-лийсса УФСИН-далул хъунама Андрей Поляковлул.
Ххал бигьлагьисса масъалалия бавтIминнахь бувсунни МахIачкъалаллал бакIчи Салман Дадаевлул.

Муния махъ ххал бивгьунни ДР-лий АТК-лул хIукмурду кIанттул цилакаялувшиврул органнал бартбигьаврил масъала. Муния ихтилат бунни ДР-лул БакIчинал кумагчи, ДР-лийсса АТК-лул аппаратрал вакил Керим Бадруттиновлул.