Ноябрь зурул 13-нний Ростов-на-Дону шагьрулий увгьунни Рос­товуллал областьрал ФСИН-лул Хъунмур управлениялул каялувчи Муслим Даххаев ва мунал заместительтал.
Муслим Даххаевлуй аьч бан къабучIисса паччахI­лугърал кьюлтIсса затру аьч баврий тахсир ккаклай бур. Судрал хIукмулийн бувну, Муслим Да­ххаев цалсса кIива зуруйсса дуснакь увну ур.
Андриана Аьбдуллаева
Вана укунсса пашмансса, тIааьн бакъасса хаварданул микI лачIун бувну бивкIру жу цинявппагу, редакциялул зузалт, арвахIкьини. КIулли ва хаварданул, жува кунма, пашман бувсса чIявусса цаймигу бушиву, цанчирча Муслим МахIаммадович ххирар, бусраври, Дагъусттаннал халкьуннан акъассагу, билаятрал цайми кIанттурдайгу. Да­ххаев тIисса фамилия жунна мудангу кьянкьашиврул, къучагъшиврул лишанну чIалай дия.

АцIнияхъайсса шинну хьу­ссар ттул Муслим МахIамма­довичлул каялувшиву дуллалисса Дагъусттаннал ФСИН-лул управлениялул дуллалимуния буслай, миннуярдагу чIярусса – ванащал хIала-гьурттуну. КъадакIнийри Муслим МахIаммадович цалагу журналистуращалсса, жяматийсса сакиншиннардал ихтиярду дуруччултращалсса хьунабакьавурттая махъаллил хьуну. Ванал, кьюлтI къабувну, бусайва цала диялдакъашивурттаягу.

Муслим Даххаев лайкь хьуну ур цикссагу аьрали ва къуллугърал наградарттан. Жунма цинявннан кIулссар 1999-ку шиналсса дяъвилул иширттаву ванал кка­ккан дурсса къучагъшиву. Тания шихуннай 20 шин ларгнугу, ванан тачIав хъамакъабитайва цала зузалт. Гьарца шинах Муслимлул сипталий шайссия аьпалул хьусса зузалтрал щахъаннищалсса хьунабакьаву.
Гьай-гьай, ва хавар цумацаннангу кьурчIи къабизансса ба­къар. Ци бухьурчагу, тIайламур, хIакьмур ялтту бувккун ля­къи­ннав.