[dropcap]С[/dropcap]урхай-Ханнал Кубок ласунсса матчрай ЧукIуннал футболданий буккултрал кьюкьлуватусса Аьли НякIучиев ва турнирданул
цалчинмур голданул автор хьунни. ЧукIуннал команда бястлий дурккунни Карашрал кIилчинмур командалущал.
П. Рамазанова
— На Избербашрай яхъанай усса чIумала, школалий дуклакинийва шагьрулул командалуву икIайссияв, Дагъусттаннал жагьилтурал турнирдай гьуртту шайссияв. Тай 1980 шинну дия, тания махъ диялсса чIун ларгунни, цIана ттун 47 шин дур, амма спортрахсса зуву ттигу дур, — тIий ур Аьли.
Ва цала тIийкун, «лакрал футболданувун» зана хьуну ур 2017 шинал. «Ккуллал шяраватусса гьалмахчунал, Эльдар Аьлиевлул, «ина циван гьуртту къашара жул турнирданий?» тIисса суал булайхту, махIаттал хьунав, ттун «Лакрал лига» турнирдания хаварвагу бакъассия тIий ур.
ЧукIуннал командагу дусса хавар шайхту, цайми жагьилталгу кIункIу бувну командалувун, чялишну хIала увххун ур. «Лакрал жагьилтал футболданухун багьаву гьарца чулухагу ххуйри, спортрая, хайр бакъа, зарал бакъассар.
Ва ялагу, жагьилтал кувннащал кув кIул хъанай, дустал-гьалмахтал хъанай бур, чIивисса жулва миллатран укунсса дусшивугу хъинни. Ттулва буржнугу чIалай ура ттунма маслихIатну чIалай бивкIмур ттуярва мюрщиминнангу лахьхьин буван. Жулва оьрчIругу спортрахун бичавугур мурад», — тIий ур Аьли.
ЧIа учинну ванангу, лакрал футболистътурангу тIайлабацIу!
