Гьарца шинал шай «Музейравусса хьхьу», «Луттирдал хьхьу» («Библионочь»), «Музыкалул хьхьу» тIисса ва цаймигу вара журалул цIардалусса Хьхьурду,
цал лагрулийгу тамашачитурахьхьун давурттая махъ, уква, культуралул иширттавух гьуртту хьунсса каши дуллалисса.
Ми цинярдагу акциярттал ахирданий, шинал ахирданучIан гъанну, шай «Маданиятрал хьхьугу». Мукунна ва ххуллухгу ноябрьданул 3-нний щалагу АьрасатнацIун Дагъусттаннайгу хьунни «Маданиятрал хьхьу» («Ночь искусств») тIисса акция.
Муний гьуртту хьунни республикалул культуралул сайки циняв идарартту. Республикалул хъуншагьрулий, ахттакьуннай ссят 5 хьуну дайдирхьуну, акция лахъи ларгуна хьхьудяризаннин.
«Маданиятрал хьхьу» тIитIлатIисса шадлугърал батIаврий гьуртту хьуна ДР-лул культуралул министр Зарема Буттаевагу. Ванил бавтIминнахь барча дурна 2013-ку шиная шиннай дуллалисса ва шадлугъ, кIицI лавгуна акциялул хъамалну шайшиву личIи-личIисса оьрмулул ва пишардал инсантал, дакI ххари хьунсса иш бушивугу миннавух яла чIявуми оьрчIру ва жагьилтал бушиву.
Акциялул дайдихьу хьуна Поэзиялул театрдануву. Ва хьхьуну шикку хьуна ДР-лул лайкь хьусса артистка Диана Увайсовал фортепиандалул музыкалул концерт. Муния махъ хъамал бувцуна ДГПУ-лул художествалул ва графикалул факультетрал дуссукъатлувун. Ва хьхьунусса хъамаллурал мукунна ххал дурна художник МахIаммад Къажлаевлул суратирттал выставкагу. Хьуна цайнува цува хьусса палеонтолог Оьмар ХIаписовлущалсса хьунабакьаву ва халкьуннал шаэр Расул ХIамзатовлул творчествалун хас дурсса батIавугу. Поэзиялул театрданувусса культуралул программа дайлиртIуна А. Пушкиннул «Мюрщи трагедияртту» тIисса произведениялийнусса кино ххал даврийну.
Муния махъ «Маданиятрал хьхьуницIун» дархIусса шадлугъру хьунни цайми-цайми идарарттайгу. Мисалдаран, Изобразительный искусствардал музейравун бувкIминнал ххал дунни «Русская акварель 19 века» тIисса цIанилусса выставкагу, хьуна ПаччахIлугърал Эрмитажрал собраниялувасса экспонатирттан хас дурсса выставкалийнсса экскурсиягу, лекцияртту ва мастер-классругу. Ва хьхьуну музейравун бувкIун бия ДР-лул ХIукуматрал председательнал хъиривчу, ДР-лул кIулшиву дулаврил ва элмулул министр Уммупазил Оьмаровагу.
Национал музейравун бувкIминнал ххал дурна «Россия – мы. Мы – россияне» цIанилусса выставка. Ахъушиял райондалул хъаннил ккаккан дурна цалла аслийсса янна-ка, «Ахъуши» ансамбльданул тIурча – концерт. Национал музейраву ва хьхьуну ялагу хьуна ДР-лул халкьуннал артист Гьарун Юсуповлул ва Карина Давидовал, «Зубари» ансамбльданул ва Дагъусттаннал филармониялул солистътурал, МахIачкъала шагьрулул музыкалул дуккаврил идарарттай дуклакиминнал гьурттушиндарайнусса концерт. Хьуна «ЧIумул ххал» тIисса цIанилусса выставка, бархъаллал тIахIунттив даврил мастер-класс.
«Дагъусттаннал шяравалу» цIанилусса музей-заповедникраву-этнографиялул комплексравугу хьхьудяризаннин хъанай дия личIи-личIисса хьунабакьавуртту, циявппагу цачIу ххал дуллай бия кино ва Халкьуннал инструментирттал оркестрданул концерт.
ДГУ-лул культуралул факультетрал студентътурал республикалул миллатирттал театрдал актертуращал, Б. Мурадовал цIанийсса Культуралул ва искусствалул колледжрал студентътуращал архIал ккаккан дуруна республикалул халкьуннал фольклордануцIунсса программа. Ахирданий хьуна пианист, актер, Аьрасатнал искусствалул лайкь хьусса ишккакку, Дагъусттаннал халкьуннал артист Хан Башировлущалсса хьунабакьаву.
ДР-лул Художниктурал союзрал Выставкартту дувай залдануву хьуна Ислам Шовкринскийл «ТIахIунттул скульптура» тIисса цIанилусса выставка.
А. Къапиевлул цIанийсса Лакрал театрданул ва хьхьуну ккаккан бувна «Гъази-Гъумучиял серенада» тIисса музыкалул къамядия.
Дарбантуллал паччахIлугърал тарихрал-архитектуралул ва художествалул музей-заповедникрал тамашачитуран ккаккан дурна Собибор лагерьданий хьусса восстаниялуцIун дархIусса экспонатирттал выставка, мукунна художник ХIамзат ХIусайновлул суратирттал ва Дагъусттаннал арамтуннал кьяпрал ва хъаннил лачакирттал бакIурдий дихьаймунил выставка.
Дунияллул культурардал ва диннал тарихрал музейравугу хьуна Аьрасатнал тарихран, культуралун ва искусствалун хас дурсса батIавуртту.
Лажин хIадур дурссар
Бадрижамал Аьлиевал
