[dropcap]В[/dropcap]ай гьантрай МахIачкъалалив Капитал ремонтрал фондрал пишакартал дакьин дуллалисса чIярузивурду дусса къатраву нанисса давуртту ххал дуллай бур.
Вай аьрххирдал лагрулий хьхьичIва-хьхьичI бивну бур Каммаевлул цIанийсса кучалийсса 15-ми къатрайн. Шикку цIана магъи цIу дуллай бур. Фондрал зузалтрал гикку ттинин дурсса давугу, ишла дуллалисса материалгу ххал дурну дур.
З. АьбдурахIманова
«ЦIанасса ппурттуву, магъи даххана дан ккаккан дурсса сметалийн бувну, цила низамрай най дур давуртту. Ттинин дан ккаккан дурсса аьмсса даврил 30 % дурну дур. Гъараллу ва марххалтту буллай байбишиннин магъи ца чулийн дуккантIиссар»,- тIий ур Фондрал отделданул хъунама Заур БахIмудов.
ЧIярузивурду дусса ва къатта бувну бур 1988 шинал. Гания шиннай шикку укун агьамсса давуртту дурну дакъар. Укун духсса къатри жула хъуншагьрулий цагу-кIирагу дакъар.
Ва базилух МахIачкъалалив 9 лахъ къатлул магъив даххана дурну, 38 лифтгу бакьин бантIиссар, 3 къатлуву инженер сетьру даххана дантIиссар ва 1 къатлул ялттумур чIира (фасад) цIу буккан бантIиссар тIий бур. ХIисав дурну, вай давуртту дацIантIиссар тIар фондран 120 миллиондалун.
