Вайнна бавахъул кIара буллай!

[dropcap]А[/dropcap]цIра-ацIния ххюра шинал хьхьичIра буттал шяраву, Цалчинмур ЦIувкIрав, ларсъсса суратир­ттал архивраву ттун ляркъунни нажагьсса лахIзарду ккаккан буллалисса суратру.


Циванни ми лахIзарду нажагьсса? ХIакьину Ла­ккуй кIара буван кIулсса ва буван ччисса нажагьсса бакъа бакъанутIий. ТтукIрал ягу газрал пачливу шавхьсса ччатI канай вардиш хьуну бунутIий.
Бярал ва тIаннул цIарай кIири бувсса кIарттуву шавхьсса ччатI канай хъуни хьусса ттул никирал инсанталгу буниялагу нахIусса ва чурххан дарув­сса ччатIуя неъмат лавсъсса агьлу бунутIий.

Щалвагу махIлалийх ппив хьуну дикIайвакьай кIар­ттуву шахьлахьисса ччатIул кьанкь! ЧIаххувращал хIала-гьурттуну, ца кулпат кунма яхъа­нахъисса жу батIайссияв ччатI шахьлахьинал кIарттухун. Мугу дия жуву кувннал кувннахсса ччаву цIакь дуллалисса аьдатрал низам. Бавахъал жун, мюрщиминнан, кIарттуву гъурсса тIисса гургри дувайва.

Гургригу цIунисирахун канай, жу гъилисса кIарттух къумпI-къумпI бивкIун бикIайссияв, ххуйва-ххуйсса оьрчIру ва душру кунма. Кувний бавахъал кIарттувусса луххавун нувщигу бичайва жу рязий буван. ИчIува бухьурча – гьивчгу. Жун, оьрчIан, нувщи ва гьивч ххуйну шахьан бай аьмалгу лавхьхьуна махъату. Ттучаннай фольга бахлай къабикIайхьунссия таний, чяйлул къуршавусса цIай-цIайтIи чагъарду ябувайссия жу нувщи ягу гьивч бахIин. Бухсса кIункIур нувщущалва луххай-цIарай бивхьунугу шахьай­ссия.

ЦIигьурнал гьунар кувнная кувннан лахьхьайссия. Буниял­ттунгу ца кулпатъя махIлалул оьрчIру! Гьай-гьай, чара бакъа хIала буххайссияв жу кIара баврил давривухгу.

Жулмур усттаршиврул бутIа бакъа шайхрав! Инттура аьраян дишайва бава­хъал синааьрщи хъунисса аьмур­даву. Жу баргъ бивтсса, дару­сса кьинирдай, запIатIи дурну ттархьру ришлай, аьрщи датлан бикIайссияв. Кувний жу чакмардавува аьрщи ккуччу дуллали бувайвав, ккупар ккуччу буллан къаччи­сса жун тай гьантрай ккупар давранну чIалан бикIайва.

Цан чирча, кьинибархан ккуччу тIун багьарчагума, ккупар дачIи кьини бувну къуртал шайссия. КIара бансса аьрщи кьини лях тIиссакссагу ккуччу дуллан багьайва. Ахиргу, кIара буллали­сса кьини дучIайхту, жу рахIатну ссихI бигьинтIиссия. Ххарил лехлай тамаша буллантIиссияв аьрщарая магьирну улттив дуллалисса хъаннил карунних. БювчIу бярду кунмасса гай улттая кIара буллай жун цимилгу ккавкссар. КIийла-шамийла цIу дирхьуну сасан бувайхту, ччатI шахьай кIара хIадурссар. Аьдатрай, цалчин бувщусса ччатIул кIарагу махIлалийх бачIайссия. КъакIулли, суратирттай дакъасса, жулва наслулун ккаккантIиссарив ва личIантIиссарив кIара баврил усттаршиву.

«ЧIимучIали»
хIадур бувссар
П. Рамазановал