Дагъусттан Республикалул БакIчи Владимир Васильевлул каялувшиндаралу хьусса ирглийсса батIаврий ххал бивгьунни цаппара агьамсса масъалартту, миннувух – кIинтнийнсса хIадуршиннагу.
ДР-лул ХIукуматрал Председательнал хъиривчу Владимир Лемешкол кIицI лавгунни сезондалулсса байсса хасъсса министерствартту гъинтнил мутталий хIадур хъанай бивкIшиву кIинтнийн. Мунал бувсмунийн бувну, шагьрулул ацIра округрая мяйннил лавсун бусса бур хIадур шаврил паспортру, ливчIсса кIиннил ласун най бусса бур, амма мунищала архIал къулагъасрала дурксса тагьар хIасул хьун бюхъаврил нигьгу дусса дур.
МахIачкъала шагьрулул бакIчи Салман Дадаевлул бувсунни октябрьданул 31-нний сакин бувшиву оператив штаб, мукунсса, къулагъасрала дурксса, тагьардалсса буллансса.
Му бакъассагу, сентябрьдания шиннай най дусса дур гъараллал щинну лагайсса канализациялулсса буллалисса, мивун нанисса ччюрк дугьлансса чаранну ляхълахъисса давуртту. Амма, ноябрьданул цалчинсса гьатрайсса гъараллу сававну, щиналу ливчIун бур шагьрулул 20-нния ливчусса кучарду, цIунилгу дурну дур канализацияртту марцI дуллалисса давуртту. Махъ шагьрулул кучардай хIасул хьусса тагьар дарсну хьуну, чIяву буван най бур аварий бригадартту ва хасъсса техника.
Шагьрулул бакIчинал ялагу бувсунни, пландалийн бувсса куццуй, ноябрьданул 12-ннин къабавцIунма, хIукму бувшиву зурул 1-нния тинмайва оьрчIал садикирттай пачру лахъан, мукунма школарттай ва медициналул идарарттайгу. Ноябрьданул 8-ннин чIявуквартирарду бусса къатравунгу гъилишиву диянтIиссар, кунни.
Ва кьини гьаз бувсса масъаларттавух бия ятинсса оьрчIру къатрал щаллу баврилмур масъалагу. Му масъала щаллу баврин республикалулмур бюджетрава ккаккан дурну дур 150 миллион къурушрал, федерал бюджетрава – 109 миллион.
Республикалул вице-премьер, кIулшиву дулаврил ва элмулул министр Уммупазил Оьмаровал цилва ихтилатраву кIицI лавгунни къатри ласун ирглий бавцIусса ятинтурал сияхI шиная шинайн чIири хъанай душиву.
Жям дуллай, Владимир Васильевлул увкунни:
— КъабучIиссар къатта багьлагьисса цаягу оьрчI цала миналул щаллу къаувну кьаитан. Хъинну хъунмасса яржа бур, арцу диял къахъанахъаву сававну, ччясса мутталий лакьин къахъанахъисса. Амма жунма бувчIин аьркинссар ятинтуран дагьайсса къатри дулун аьркиншиву. Вагу, цаймигу масъалартту щаллу шавриву налогру датIавриягу кумаг хъанахъиссар. Ца чулуха жулла хъинну хъуннасса луртан дур, хаснура налогирттацIун дархIуну, вамур чулуха – агьалинал хьхьичIсса хъунисса буржругу, хаснува социал чулуха къабурувччуминнал хьхьичI. Тавакъюри ва кIану мудан дакIний битаву.
