ДакIнийн утанну

Хъювхъиял МахIачлуха

Ноябрь зурул 7-нний увссар ххаллилсса чув, тарихрал элмурдал доктор, профессор,

 Хъювхъиял шяравасса АхIмадлул арс МахIач МахIаммадов. Аьпалухьхьун лавгсса ттула гъанчу увсса кьинилуцIун бавхIуну чичав ва шеъригу.

***
Зунттал хъархъала хьуну,
Щарнил хьхьичI ацIайссияв,
Махъ учин аьркин хьуни,
Бюхханну учайссия.

Увкумуний цIу бусса,
АвцIуний цIампир бусса,
Урувгнал я буччайсса,
Авурсса бакIрал заллуй.

Оьрмулул лахъишиврий
Буттал махъ щяв къабивхьсса,
Чумартсса, дугърисса чув,
ЦIа бюхттулсса лаккучу.

Ахиратрахь унугу,
Уттигу сагънувасса,
Щалагу Аьрасатлийх
ЦIа гьан дурсса дурккучу.

Щарнил лажинну хьусса
Ххаллилсса хъювхъиричу,
Машликьхъал тухумрайсса
Ва АхIмадихъал МахIач.

Хьурдай чара цал ттигу
Вищал жапрай щябикIан,
Ина бусай хавардах
ВичIи дишин уттигу.

ДакIнийн бичайва ина,
Аьпалувух бивхьуми,
Жула буттал ппухълуннал
Кьиямасса кьинигу.

Пахрулий кIицI лагара
Вищалсса маччашиву,
ХIажинал ва Машликьлул
Наслу жува бушиву.

Чаннаннил дакI диявав
Га вил бавал Барибал,
Хьхьурай агьи тIий аьтIий,
Дяхтта зухь, хъяй, гъалгъа тIий,

Цукун бювхъунававли
Мукьра шинал мутталий
Бутта аьрайва ливчIсса
ОьрчIахь къабувсун ябан.

Цуксса захIмат хьунавав
ОьрчIая чиваркI хьуннин,
Оьмур ва хъинмур цирив
Буттал зумату буслан.

Щарнил тарих кIул буллай,
Архивру дакIних лахьлай,
КIалазурттай чивчумур
ЛивтIуминная ккалай,

Шиннардил манзилданий
Ина бивхьусса захIмат
ХIайп бакъаявкьай, МахIач,
Чулийн къабувккун личIан.

Ина чирчу дуаьгу —
Вия жуйнсса аманат,
Муний тIимур щаллу бан —
Жулгу илагьийсса бурж!
Асият Аьлиева,
ш. Хъювхъи