[dropcap]В[/dropcap]ай гьантрай Дагъусттаннал КIулшивуртту хьхьичIуннай даврил институтраву хьунни педагогнал даврий
хъунмасса захIмат бивхьусса ветерантурал конференция. Педогогтал-ветерантал, насихIатчитал цачIун буллалисса конференция республикалий цалчинни хъанахъисса. Шикку гьуртту хьунни институтрал элмийсса ва методикалул даврил проректор, педагогикалул элмурдал кандидат Миясат Муслимова, республикалул шагьрурдаясса ва районнаясса кIулшивуртту дулаврил идарарттай зий бивкIсса педагогтурал советирттал председательтал.
Имара Саидова
Конференциялий правлениялул председательну увчIунни чIярусса шиннардий учительну зий ивкIсса, ДР-лул лайкь хьусса учитель, АьФ-лул кIулшивуртту дулаврил отличник, «Дагъусттаннал Макаренко» Маккуев МахIаммадхIажи Асадуллагьлул арс.
Педагогтурал Ветерантурал советрал даврил координаторну бур Миясат Муслимова. Ветерантурал совет сакин бувансса сиптачинугу хьуну, ххюра шинал мутталий му даву дузрайн дуккан давриха зий ивкIун ур МахIаммадхIажи Маккуев. ХIакьину ва барчаллагьрай ур Совет сакин бавриву кабакьу бувсса ДР-лул кIулшивуртту дулаврил министр Уммупазил Оьмаровайн.
Гьай-гьай, цIанасса чIумал бусса оьрму педагогнал пишалун харж бувсса, хъунмасса захIмат бивхьусса инсантал хъамабитала хьунугума бур. Цуксса хIайпнугу, школарттал каялувчитуран, кIулшивуртту дулаврил управлениялул хъуниминнан ми личIину итталун багьлайгума бакъар. ХIакьину интернетрал бияла хьхьичIунсса замана бувкIун бур. НукIувасса учительтал тIурчан, дарсру дихьлай бивкIссар так цалла кIулшивурттайн чул бивщуну. Миннал хIарачатрайн бувну, цимирагу никирая, лайкьсса кIулшивурттугу дуллуну, машгьурсса инсантал бувссар. Учительнал захIматран, буниялагу, кьимат бищун захIматссар.
Жула республикалий личIаннин, Аьрасатнал цинярдагу субъектирдай уттинин сакин бувну буссия педагогтурал – ветерантурал советру. Укунсса советру сакин баврийну ххишалану ахттар бан хьунтIиссар опыт бусса педагогтурал даврил захIмат ва аьлтту бан хьунтIиссар гьунар бусса жагьилсса педогогтал.
Конференциялий сакин дунни гихуннай дуллантIисса даврил плангу.
Педагогтурал советрал цалчинсса даврил дайдихьугу дунни «Солнечный берег» лагерьданийсса дуккавриву хьхьичIун ливчусса оьрчIащал цачIуну.
