Ларгсса нюжмаркьини, ДР-лул ХIукуматрал хъунама Артём Здуновгу гьуртту хьусса заседаниялий, министртурал бувсунни терроризмалун ххуллу кьукьинсса мурадрай цуку-цукунсса давурттив дуллай буссарив.
Ва даврил ялувацIаву дуллалисса вице-премьер Рамазан Жяъпаровлул дакIнийн бувтунни 2006 шинал март зуруй кьамул дурсса терроризмалущал талатаврил чаранну ккаклакисса закондалул гьанулий паччахIлугърал органну зун аьркиншиву. Ва ххуллий дуллалисса давурттая бувсунни промышленностьрал ва энергетикалул министр Сайгидпаша Умахановлул, захIматрал ва соцразвитиялул министр Изумруд МухIуттиновал, информатизациялул, связьрал ва массовый коммуникациярдал министр Сергей Снегиревлул.
Изумруд МухIуттиновал бувсунни терроризмалул ххуллия махъаллил хьуми ва дуснакь лавхъун бувкIми давурттал дузал баврия, бувсунни 10 зурул мутталий 12 азара инсанная сайки 10 азара даврил щаллу увшиву, дуснакьрава увксса 17 инсаннаягу 8 даврил щаллу увшиву, къакIулмургу лахьхьин бувну.
Сергей Снегиревлул бувсунни интернетрай терроризмалул идеология ппив къадулланшиврул цIакьну ялув бавцIуну бушиву ва мукунсса мурадрай къуццу тIутIиминная низам дуруччай органнан хавар байшиву. Бувсунни мукунсса 114 иширая органнан хавар бувшиву.
П. Рамазанова
