Прокуратуралул хIасиллава

ОьрчIал ихтиярду дуруччаврил цIаний

Дунияллул халкьуннал дянивсса оьрчIал ихтиярду дуруччаврил кьинилуцIун бавхIуну, МахIачкъала шагьрулул прокурорнал хъунама кумагчи

Шахаев Юсуп гьуртту хьунни Аьрасатнал ихтиярдал академиялул сипталий МахIачкъалалив дурсса региондалул элмулул ва практикалул конференциялий.
Конференциялий гьаз бунни ттизаманнул шартIирдай оьрчIал ихтиярду дуруччаврил масъалар­тту. Студентътурахь бувсунни му чулухуннай прокуратуралул дуллалисса даврия, бувчIин бунни балугъравун къабивсса оьрчIру тарбия баврил бурж биттур къабуллалими (ст. 156) ва мюрщисса оьрчIру нигьачIаву дусса тагьарданий кьабивтми (ст.125) жавабрайн буцайшиву. Бувцунни прокуратуралул практикалувасса цаппара мисаллу.
Хъирив ванал жавабру дуллунни студентътурал ва конференциялул гьурттучитурал суаллахьхьун.
С. Решетников,
Шагьрулул прокурорнал бигарду щаллу буллалима, юстициялул советник

Тахсир хьуминнаясса тIалавшин

«НигьачIаву дакъасса ва ххуйсса ххуллурду» тIисса национал проект цукун щаллу дуллай бурив кIул баву мурадрай, шагьрулул прокуратуралул хъиривлаявуртту дунни. КIул хьунни МахIачкъала шагьрулул ЖКХ-лул кIицI ларгсса проектрал лагрулий дан аьркинсса давуртту багьайсса куццуй дуллай дакъашиву. Программалий ккаккан дурсса давур­тту даврийну чIярусса ДТП-тту хъанахъисса кIанттурду чан хьун аьркинссар, мукунна чIири хьун аьркинссар ДТП-ттаву оьрмулуцIа хьуминнал ккал. Ххуллурдайсса тагьар къулай даву мурадрай, ишла дуллан аьркинссар хьхьичIунсса технологияртту ва материаллу, ххишалану бацIан аьркинссар ххуллул низамрал тIалавшиннарду дуру­ччаврил ялув, мукунна ххишала­сса тIалавшинна дикIан аьркин­ссар щупиртурал хIадуршиндарал чулухуннайгу.
ХIакьинусса кьининин Ма­хIачкъала шагьрулул 11 дуккаврил идаралул чIарах багьайсса давуртту дурну дакъар. Мукунна мюхчаншиву дузал даву мурадрайсса давуртту дурну дакъар Насруттиновлул цIанийсса кучалий, Къорхъмасовлул, А. Аьлиевлул, И. Казаклул цIанийсса ва цаймигу (аьмну 9) МахIачкъала шагьрулул кIичIирттаву. Жаваблувсса къуллугъчитурал вай давуртту аьркин­сса куццуй къадурну тIий, прокуратуралул зузалтрал тIайла був­ккунни Управлениялул хъунаманайн тахсир хьуми жавабрайн буцин тIалавшинна дуллалисса ча­гъар.

Мадина ХIажимурадова,
МахIачкъала шагьрулул
прокурорнал кумагчи.

ХIадур бувссар
А. Аьбдуллаевал