[dropcap]А[/dropcap]лхIаткьини М. Илиясовал цIанийсса «Дараччи» клубраву хьунни МахIачкъала шагьрулул школарттай лакку мазрал дарс дихьлахьисса учительтуращалсса хьунабакьаву.
Цувгу хас дурну дия цIусса дуккаврил шинан ва Учительтурал кьинилун.
Зулайхат Тахакьаева
[dropcap]К[/dropcap]лубрал хъунмур Гульшан Хасаевал бувсунни цалла даврия, аьпабиву, Мариян Илиясовал лакку маз ябаврил цIаний дурсса ва дялирчIсса давурттая, лакку мазрал дарс дихьлахьисса учительтурах дуллай бивкIсса къулагъасрая. КIицI лавгунни мукьахунмай цуппагу хIарачат буллантIий бушиву мува ххуллу-ххуттайх бачин.
[dropcap]Б[/dropcap]арчаллагь увкунни чIярусса шиннардий лакку маз буруччаврил цIаний бувсса захIматрахлу. Клубрал чулуха буллунни барчаллагьрал чагъарду ва Мариян Илиясовал кашилуцIух итабавкьусса ниттихъан хас дурсса назмурдал жужру.
«Дараччи» клубрал ца яла чялишсса уртакь, «Инт» этно-кафелул хъунмур Саида Кьурбановал тIайла дурксса хIакьсса лакку дукрардал ссупралух кувннал кувннащалсса жапгу бия лакку маз ябавриясса, хьунадакьлакьисса захIматшивурттаясса, луттирду биялну бакъашивриясса, лакку маз ябаврил ца яла хьхьичIунми кюрттину хъанахъисса Лакрал театрдания ва «Илчи» кказитрая. ТIий бия лакку балайрдугу.
Гульшан Хасаевал барчаллагь увкунни хьунабакьаву сакин дан чIарав бавцIусса Индира Мирзаевахь ва МахIачкъала шагьрулул 16-мур школалий лакку мазрал дарс дихьлахьисса ПатIимат Аьлиевахь.
