[dropcap]О[/dropcap]ктябрь зурул 11-нний Оьруснал театрдануву лавайсса даражалий лавгунни Дагъусттаннал лайкьсса арс, ПаччахIлугърал ишккакку, чIярусса шиннардий ДАССР-данул Госпландалул председательну зий ивкIсса Аьвдуллагь ХIажиевлул 100 шинан хас бувсса мажлис.
ХIадислул арс Аьвдуллагь ХIажиев увну ур 1919 шинал октябрь зурул 4-нний ШавкIуллал шяраву цIа дурксса революционер, паччахIлугърал ва жяматийсса ишккакку ХIадис ХIажиевлул кулпатраву.
1933 шинал 7 классгу къуртал бувну, увххун ур Дагъусттаннал индустриальный техникумравун. 1937-ку шинал му къуртал бувну махъ личIи-личIисса давурттай зий ивкIун ур.
1937-ку шинал щалагу хIукуматрайх ппив хьусса репрессиярттал щатIахьхьун иривну ур Аьвдуллагьлул ппу ХIадисгу.
Бутта чIарав акъасса шинну ванал оьрмулуву хъинну захIматсса хьуну дур. Амма захIматшивурттал ва хъиннува сасан увну ур. 1939 шинал ппу итаавкьуну ур. Хъиривва цамургу ххарисса иш хьуну бур ванал оьрмулуву. Та ппурттуву Аьвдуллагь ивкIун ур «Дагъусттан» гостиницалул къатри дуллалисса бригадалул бригадирну.
Ца дарщусса кьини даврия шаппай бачин нанисса чIумал, ванан хIисав хьуну бур шамилчинмур зивулийсса чIира багьсса. «Халкьуннал душманнал» арснахун бахчинсса багьантту лякъинтIишиву кIулну, Аьвдуллагьлул чарил усттаргу лявкъуну, щаллусса хьхьуну зий, гьунтти кIюрххилнин чIира бацIан бувну бур. КIюрххил шиккун увкIун ур цIадурксса партиялул зузала, СССР-данул СНК-лул (совет народных комиссаров) председательнал хъиривчу Лазарь Каганович.
Ванал цIа дурну дур хIарачат бувсса «стахановец» Аьвдуллагьлуя ва тапшур бувну бур партиялул горкомрал цалчинма секретарьнайн ва комсомолданул давривун кIункIу ан. Аьвдуллагь увчIуну ур МахIачкъалаллал комсомолданул горкомрал кIилчинма секретарьну, 1941-ку шинал тIурча ивтун ур цалчинма секретарьну. Муния шихунмай личIи-личIисса жаваблувсса къуллугъирттай зий ивкIун ур.
50-ку шиннардий ванал къуртал бувну бур Москавуллал инженерно-экономический институт. 1960-ку шинал ивтун ур кIанттул промышленностьрал министрну, яла ДАССР-нул Министртурал Советрал Председательнал хъиривчуну.
1963 шинал ивтун ур ДАССР-данул Госпландалул председательну. Ва къуллугърай Аьвдуллагь ХIажиевлул 23 шин дурну дур. Тай шиннардийсса (60-80 ш.ш.) республикалул хъуниминнал цала дянив ванайн «Аьвдуллагь-Госплан» учайсса бивкIун бур. 24 шинал лажиндарай ва увчIуну ур ДАССР-данул Верховный Советрал депутатну.
Аьвдуллагь оьрчIал, оьрчIал оьрчIал хьуну бур ванал цIа лайкьну дуручлачисса инсантал. 
Андриана Аьвдуллагьева
Мажлисрай гьуртту хьун бувкIун бия республикалул къуллугъчитал, Аьвдуллагь ХIажиевлул гъан-маччами, архIал зий бивкIми, ванал хIурмат буми. Зал щапI куну бувцIуну бия. Мажлис байбивхьунни Аьвдуллагь ХIажиевлул оьрмулул ва захIматрал ххуллия бусласисса документальныйсса суратрая.
ДР-лул БакIчи Владимир Васильевлул цIанияту цинявппа барчагу бувну, Аьвдуллагь ХIажиев дакIнийн утлатисса ихтилат бунни Дагъусттаннал Халкьуннал Мажлисрал председатель Хизри Шихсаидовлул. Ванал кIицI лавгунни Аьвдуллагь ХIажиев паччахIлугърал хьхьичIунсса ишккаккултравасса ца ушиву, ванал хъунмасса захIмат бивхьушиву Дагъусттаннал экономикалул даража гьаз бан, халкьуннал ахIвал-хIал къулай бан.
— Ва ия инсантуращал хIал бавкьусса, жяматрал буруккин кIулсса, иш багьний чIарав ацIайсса, кумаг байсса къуллугъчи. На нава чIявуну ванащал маслихIат ккаккайссия ттула иширттаву. Ванал бувсмургу ттун оьрмулуву ххуйну бучIи лявкъунни. Аьвдуллагь ХIажиевлул хIурмат хъунмасса бия Дагъусттаннал халкьунначIа. Ванал оьрчIругу буттан лайкьсса Дагъусттаннал цIа гьаз дуллалисса бур, — увкунни Хизри Шихсаэдовлул. Аьвдуллагь ХIажиевлул бигьа бакъасса оьрмулия ва ванал дурсса ххаллилсса давурттая бусласисса, ва дакIнийн утлатисса ихтилатру бунни Ухссавнил Ккавкказуллал иширтталсса буллалисса Аьрасатнал министр Сергей Чеботаревлул, ДР-лул бакIчиначIасса Хъунисриннал советрал председательнал хъиривчу Рапи Абакаровлул, Лакрал райондалул бакIчи Юсуп МахIаммадовлул ва м.ц.
— ЧIярусса шиннардий жаваблувсса къуллугъирттай зий ва каялувчинал эбратну хьуссар дагъусттанлувтуран. Ванал хIурматгу, сийгу хъуннасса диркIссар гьунар бусса каялувчи хIисаврайгу, ххаллилсса пишакар ва инсаншиву дусса къуллугъчи хIисаврайгу.
Дагъусттаннал Госпландалул председательну ивкIсса шиннардий Аьвдуллагь ХIажиевлул хъунмасса захIмат бивхьуссар республикалул экономика хьхьичIуннай дан, — увкунни С. Чеботаревлул. Цинявппагу ихтилатчитурал кIицI лавгунни Аьвдуллагь ХIажиев жаваблувшинна дусса зузала, цаяра ва цайминная тIалавшинна дусса каялувчи ивкIшиву. КIицI ларгунни ванал инсаншиву, аьчухшиву, тIайлашиву.
Лакрал райондалул администрациялул бакIчи Юсуп МахIаммадовлул цала ихтилат къуртал буллай, барчаллагь увкунни Аьвдуллагь ХIажиевлул мажлис хъун бан бувкIминнахь, барчаллагь увкунни ванал арс, Конституциялул судрал судья ХIадис ХIажиевлухь гьарицагу райондалий дуллалисса давурттал чIарав ацIлай тIий.
Ихтилатру къуртал хьуну махъ Лакрал театрданул артистурал ва Лакрал райондалул культуралул къатлул зузалтрал ккаккан дунни концертрал программа.
ДакIнихтунусса барчаллагь тIий ура, чIярусса шиннардий Дагъусттаннал Госпландалул председательнал къуллугърай зий ивкIсса жула буттал, Аьвдуллагь ХIажиевлул, оьрмулул 100 шин бартлаглагисса юбилейрал мажлисрай гьуртту хьун бувкIсса цинявппагу дагъусттанлувтурахь.
ЦIуллушиву дулуннав, ххари-хъиншивуртту чIяру даннав.
ХIажиевхъал кулпатрал цIания ХIадис ХIажиев
