Хъунмасса Буттал кIанттул цIанийсса дяъвилий Ххувшаву ларсун 75 шин хьунтIий дур ялун нанисса шинал. Ва иширацIун бавхIуну дунияллийн бувккунни «Ккурккуллал Аьрали ва захIматрал савлугърал музей» тIисса Даниял Магьдиевлул лу.

А. Аьбдуллаева
Луттирал цIанива бувчIла­чIисса куццуй, шиву бувсун бур 1982-ку шинал авторнал сипталий гьану бивзсса Ккур­ккуллал школалул, шяраваллил музейрал тарихрая ва 37 шинал лажиндарай шиву хьусса цIушиннардая, дахханашивур­ттая, музейрал давриву авторнал чIарав бавцIуминная. Яла-яла, музейрал экспонатирттая.

Музей сакин бансса пикри цукун хьуссарив буслай, луттирайсса хьхьичIмукъуву автор чичлай ур:
«Хъунмасса Буттал кIан­ттул цIанийсса дяъвилия ттун оьрчIнийва кIулссия, кIул­ссия жула шярава дяъвилийн лавгминная, кIулссия цалчинсса кьурчIисса хавар шяравун 1939 шинал бившиву, Финнащалсса дяъвилий ивкIушиву АьвдулпаттахIлул арс ХIажимуса. Шяраву бия кIи-кIия, шан-шама арс дяъвилий ливчIсса кулпатру. КIулссия шярава дяъвилийн лавгминнаву яла оьрмулул чIивима Загьралул МахIамма ивкIшиву (Шагьмарданов), ва дяъвилийн хушрай лавгун ивкIшиву ва зана къавхьушиву. Институтгу къуртал бувну, Ккурккуллал школалийн зун увкIсса чIумал, ттун бувчIлай бия оьрчIру Ватан ххирану тарбия баврих хъуннасса къулагъас дикIан багьлай бушиву ва школалий ми масъаларттаха зунсса центр аьркиншиву.

200 къатта бусса Ккурккуллал шярава дяъвилийн лавгун ур 128 инсан, зана къавхьуну ур 57. Ттун ччай бия вайннал аьпа абад бан, ччай бия ялун нани­сса никирангу жула вирттаврая кIулну. Вана укун айивхьуссара на ва музей буллай. Та чIумал ттун ча пикри хьунссия ванияту райондалийгу, республикалийгу цIа дурксса музей хьун­ссар куну».
Авторнал хьхьичIмукъул хъирив луттираву М. Даглаковлул чивчуну бур авторнал оьр­мулия ва творчествалия. Луттираву бивщуну бур Даниял Магьдиевлул «СаллатIнал нину» тIисса шеъри ва «Ниттил ча­гъар» поэма.

ЛичIи-личIину, суратирттайну чIюлугу бувну, бувсун бур музейрал цинярдагу (6-7) отделениярттая. Ккаккан дурну дур гьарица отделениялул экспонат­ру. Музейрал яла ххазинамур экспонат хъанай бур дяъвилия зана къавхьусса 57-гу ккуркличунал цIа варакьрай чирчусса ЯтIул ттугъ. Ва буккан байссар гьарица шинах Ххувшаврил байрандалул шадлугърай. Ва кьини ттугъ шяраваллил майданнийх ласун вихшала дайссар марцIну ххювардай дуклаки­сса оьрчI-душварайн. Музейраву ду­ссар фронтовиктуран хас дур­сса стенд ва гьарцанная чивчу­сса суратирттащалсса альбомру. Утти шикку ххи хьуссар гьарнал цIа чирчусса медаллугу. Вай медаллу дурну диркIссар Ххувшаву ларсун 70 шин бартлаглаги­сса байрандалийн.

Дуссар музейраву фашистурал концлагерьдай инсантурай буллай бивкIсса зулму-къиялия бусласисса экспонатругу.
Луттираву дур музей ххал бувминнал кьариртсса чичрурдугу.
Бувсун бур чIярусса шиннардил хьхьичIва, билаятрай булланнинма, Ккурккуллал школалий буллай бивкIсса «БивкIу бакъасса полкрал» акциялия.

Махъсса лажинтирттай був­сун бур музейрал даврил чIарав бацIлай, ка-кумаг буллай бивкIминная. Луттирал ахирданий рирщуну дур дяъвилия зана къавхьусса ккурккуллал сияхI.
Даниял Магьдиевлул лу ххаллилсса бахшишну хьунссар школардал учительтуран, дуклаки оьрчIан, библиотекарттал зузалтран, цинявппагу Ватан ххираминнан.