«Жул ахирмурад – анаварсса бущилул интернет Дагъусттаннал гьарца къушлийн бучIавур», — увкунни Республикалийн къуллугърал аьрххилий увкIун ивкIсса
Аьрасатнал цифрардал лябуккулул, дахIаврил ва агьалинансса коммуникациярттал министр Константин Носковлул.
ДР-лул ХIукуматрал Председатель Артем Здуновлул ва Константин Носковлул дунни республикалий «Цифрардал экономика» тIисса национал проект дузрайн дуккан даврин хасъсса батIаву.
Артем Здуновлул бувсунни га кьини Константин Носковлущал архIал лавгун бивкIшиву Къарабудахккантуллал райондалийсса «Аьрасатнал почталул» отделениялийн, яла ДГУ-лул гьанулий тIивтIушиву «Яндекс Лицей».
«ХIакьину чIярусса программарттавун рухI дукIлай дур, Дагъусттан хъанай бур тIивтIусса платформа», — увкунни премьер-министрнал.
Константин Носковлул дакIнийн бувтунни Дагъусттаннай хъуннасса даву дуллай бушиву социал мяъна дусса объектру анаварсса бущилул интернетрацIун базаврин хасну. Мунал тIимунийну, шинал ахирданийннин базин аьркинссар уттигу 2500-нния ливчусса объектру. Му даву дуллай бур «Квант-телеком» тIисса компаниялул.
Мунал ляличIисса ургъил бунни аналограя цифрардал телевидениялийн бучIаврил масъалалух. Министрнал тIимунийну, цIанасса ппурттуву 100 млн. ххишаласса инсантурал щалва билаятрай ккаклай бур цифрардал телевидение. ЛирчIун дур 21 регион. Федерал ведомствалул бакIчинал умуд бивхьунни Дагъусттаннайгу, захIматшиву къархьунура «цифрардайн» бучIаншиврийн.
Константин Носковлул бувсунни почталул отделениялий (Гелиннал шяраву) къадиркIшиву цифрардал приставкартту. Гьаман почталул отделениярттайри инсантурал антеннарду ва приставкартту машан ласун аьркинсса, сигналлу дугьланшиврул.
Артем Здуновлул жаваблувсса къуллугъчитурайн тапшур бунни, волонтерталгу бувцуну, уттигу цал биян почталул отделениярттайн.
Социал объектру интернетрацIун базаврил давуртту ссайн дирну дуссарив бувсунни ДР-лул минкомсвязьрал бакIчи Сергей Снегиревлул. Мунал тIимунийну, гьашину базинтIий бур 661 объект, бюхъайссар миннуяр ххишалассагу базин.
Масъалалул хIакъираву ихтилат бунни «Квант-телеком» АО-лул гендиректор Евгений Болдыревлул, «Электросвязь» АО-лул гендиректор Будун Будуновлул,
Дагъусттаннайсса сотовый дахIаврил оператортурал.
Артем Здуновлул тапшур бунни анавар дуккан дуван цифрардал ТВ-лийн бучIаврил давуртту.
ХIадур бувссар
ХI. Аьдиловлул
