Бусравсса чувнал бусравсса юбилей

[dropcap]О[/dropcap]ктябрьданул 5-нний, дунияллий ца яла бусравмур сянат язи дургьуминнал пишалул байрандалул кьини – Учительнал кьини, МахIачкъалалив «Апрель» ресторандалувун бавтIун бия ГьунчIукьатIрал

шяраваллил жямат, Лакрал райондалул чIявуми школардал директортал ва учительтал, цаймигу пишардал за­ллухъру. Ва кьини шикку цалва оьрмулул 60 шинал юбилейрацIун дархIусса шадлугъ кIицI лаглай ия «Дагъусттаннал лайкь хьу­сса учитель», «АьФ-лул аьмсса кIулшиву дулаврил бусравсса зузала», лараймур категориялул учитель, Лакрал райондалийсса ГьунчIукьатIрал дянивмур даражалул школалул директор Къушиев Малик МахIаммадлул арс.


Бадрижамал Аьлиева
[dropcap]М[/dropcap]алик МахIаммадович барча уван бувкIун бия Лакрал райондалул администрациялул ва райондалул УО-рал каялувшинна, даврил уртакьтал, гъан-маччами ва ванал дарс дирхьуми.
Махъру лавхъунни Лакрал райондалул администрациялул бакIчи Юсуп МахIаммадовлул, райондалул КIулшиву дулаврил ва культуралул управлениялул бакIчи Явсупи ХIамзаевлул, Гъумучиял школалул директор Хадижат ХIусниевал, ГьунчIукьатIрал шяраваллил жяматийсса советрал бакIчи ХIажибутта ХIусайновлул, ишбажаранчи Марат Илиясовлул, ГьунчIукьатIрал шяраваллил администрациялул бакIчи МухIад Штанчаевлул, Дагъус­ттаннал Транспортрал министерствалул отделданул хъунама Зиябуттин ХIажимирзаевлул ва чIявусса цайминналгу.

[dropcap]М[/dropcap]ахъру лахълахъими цалва ихтилатирттаву кIицI лаглай бия 30-нния лирчусса шиннардий Малик МахIаммадовичлул каялувшиву дуллалисса школа райондалий ва республикалий язими школарттал сияхIрай бушиву ва ва цувагу кIулшиву дулаврил системалуву зузиминнал кьюкьрал хьхьичIххуттай ушиву, вай шиннардий шяраву ва школалий ванал хIарачатрайну хьусса хьхьичIуннайшивуртту.

Цала хIурмат лавайсса, цана ххирасса каялувчи барча уван бувксса ГьунчIукьатIрал школалул хъунмасса ва бавкьусса коллективрал кIицI лавгунни Малик МахIаммадович ушиву цаятура ва махъминная тIалавшинна ларайсса кьянкьасса каялувчи, мунищала архIал инсаншиврул бутIа ххину буллусса, ччимур чIумал кумагран учIан хIадурсса чув, цимивагу гьунарданул заллу ушиву.

Ва кьини лавхъсса язисса махъругу, дурсса къавтIавурттугу, увкусса балайрдугу хас бувну бия ххаллилсса чувнан, ххаллилсса юбилейрацIун бавхIуну. Жула чулухагу барча уллай хIурмат лавайсса Малик МахIаммадович, чIа тIий буру кулпатравусса ххари-хъиншивуртту, цанна ххирасса даврий зунсса цIуллусса чIярусса шинну, бусравсса учительнал пишалул кьадру бусса дуклаки оьрчIру.
Юбилярнащалсса интервью дуккияра кказитрал хъиривсса цания ца номерданий.