[dropcap]О[/dropcap]ктябрь зурул 22-нний Москавуллал Миллатирттал къатлуву хьунни ирглийсса «КIяла кьурукьирттал» байран.
Ва литературалул байран гьар шинах дувайссар. Гьашинумур байран 33-мурди.
ПатIимат Рамазанова
Байрандалийн бавтIцири барча буллай, «Дагъусттан» культуралул центрданул Президент Арсен ХIусайновлул кIицI лавгунни ва байран циняв дяъвирдай ливтIуцири дакIнийн бичлачисса аьпалул давунугу шайшиву, поэзиялул, пасихIсса мукъул ва авадансса музыкалул байраннугу шайшиву. Аьрасатнал лайкь хьусса артистка, Дагъусттаннал халкьуннал артистка Фаина Графченкол бувсуна цуппа Расул ХIамзатовлущал зий бивкIсса чIуннардия, муданма кунма, бюхханну бувккуна шаэрнал шеърирду.
Шеърирду бувккуна Москавуллал школардай дуклакисса оьрчIалгу, Алексей Иноземцевлуя тIайла хьуну, цIанихсса шаэртуралгу, къазахнал жяматрал вакил Улжан Даулетбаева хIаласса цайми хъамаллуралгу. Дунияллул халкьуннал дянивсса конкурсирттай хьхьичIунсса кIанттурду бувгьусса пианист Сергей Мочаловлул, балайчи, композитор Владимир Мирзал, балайчи Валерия Струкановал, МухIаммаднур Султановлул каялувшиву дуллалисса «Шоу группа Лезгинка-Дэнс» ансамбльданулгу ккаккан бувна цалва бюхъу-гьунарду.
Мероприятие дачин дурну ия ВГИК- рал выпускник, театрданул ва кинорал актер Ислам ИсабахIандов.
Залдануву ккаккиялун дирхьуну дия Расул ХIамзатовлул архивраватусса суратру, ккаккан дурна ванал оьрмулиясса видеосуратгу. Байрандалий гьуртту хьуна шаэрнал душру ПатIимат ва Заремагу.
«Ва, поэзиялул ва музыкалул байран дакъагу, халкьуннал дусшиврул, цашиврул байрангу хьунни, рувхIанийсса ххуйшиврул лишаннугу хьунни, пасихIсса мукъул цIакь ва бияла, щил ци учирчагу, бюхттулли, му мукун бушиву байрандалулгу ккаккан бунни. ТIааьн бизансса иш бур укунсса мероприятиярттай жулва лак мудангу чялишну гьуртту шайшиву», — увкунни «Дагъусттан» культуралул центрданул вице- президент БатIи Оьмаровал. Москавуллал Миллатирттал къатлул цIаниятусса Барчаллагьрал чагъар ванингу буллунни.
