[dropcap]О[/dropcap]ктябрьданул 8-нний Дагъусттаннал БакIчи Владимир Васильев гьуртту хьунни ярглийсса Национал антитеррор комитетрал

батIаврий Пятигорск шагьрулий. БатIаврил каялувшиву дуллай ия Аьрасатнал ФСБ-лул директор, НАК-рал председатель Александр Бортников.

---

Муний ххал диргьунни Ух­ссавнил Ккавкказуллал федерал округрай террорчишиврул ххуллийсса тахсирлувшивуртту тамансса чан дуван хьусса гужирдал ва профилактикалул давур­ттал хIасиллу. Агарда 2017 шинал хьуну диркIхьурча мукунсса 15 тахсирлувшиву, 2018 шинал – 6, гьашину тIурча, дурагу – 2.
БатIаврий гьуртту хьунни НАК-рал члентал, Аьрасатнал Президентнал СКФО-райсса вакил, АьФ-лул цаппара субъектирттайсса антитеррор комиссиярттал вакилтал, ихтиярду дуруччай органнал ва хасъсса къуллугъирттал (спецслужбы) бакIчитал.

БатIаврий махъ лахълай, Александр Бортниковлул бувсунни гьашину 15 террорданул хьхьичIалу кьуркьушиву ва 30 террорданул кюру бухлаган бувну бушиву. Ми хIадур хъанай бивкIун бур тахсирлувшивуртту дуван чIявусса инсантал салкьи хьусса кIанттурдай. Александр Бортниковлул тIимунийну, мукунсса тагьардаву ялу-ялунгу хъун хъанай дур терроризмалул профилактикалул давуртту ду­ллалаврил мяъна.

Ми давуртту дуллай бур регионал исполнител властрал органнал ва антитеррор комиссиярттал.
НАК-рал председательнал бусаврийну, аьркинни терроризмалул профилактикалул давур­ттал мюнпатшиву лахъ дуллан, хаснура мунил идеологиялийн къаршими давуртталсса. Ми давурттавун кIункIу буллан аьркинни жяматийсса сакиншиннарду ва граждан обществалул цаймигу идарартту. Ми давур­ттавух хIала-гьуртту буллан аьркинну бур диннал сакиншиннардал сий-бусраврайсса вакилтал, радикалсса идеология агьалинавух ппив къахъананшиврул.

Терроризмалул профилактикалул агьамсса къярттану хьу­ссар СКФО-рал циняв субъектирттал СМИ-лий ва сетраву антитеррорданул контент гьартану щурущи дуллалаву. Му даву дуллан бивкIун махъ медиапространствалий дурккун дур 75 азаруннияр ххишаласса материаллу, миннувух дур 400 видеосюжет, террорданул иширттая инкар хьусса инсанталгу гьур­ттусса.

Масъала ххал бигьлагьини ляличIисса къулагъас дунни энергетикалул, транспортрал, социал сфералул ва чIявусса инсантал салкьи шайсса объектру буруччаврил масъаларттах.