Ванал цIа мудангу илданий дур

Цала агьлу-авладращал

Хъусращиял жяматрал ва лакрал лайкьсса арс АьбдурахIман Адамов ниттил увну вай гьантрай там хъанай дур 70 шин. Му чIумул мутталий ванал бивтсса оьрмулул ххуллу балгусса бур личIи-личIисса иширттал ва мурадирттал.

Ванал му ххуллу бивтун бур (битлайгу ур) цала намусрал хьхьичI цува жагъала къахъанансса куццуй, чил лахъунтталун къаагьансса кьяйдалий.
АрулцIалла шинал лахъазанттуй авцIусса инсанна­хьхьун, «Илчи» кказитралгу дуснахьхьун, МахIаммадлул арс АьбдурахIманнухьхьун буларду жугу цаппара суаллу – хIалу дуссагу, дакъассагу.


— Бувсун ччива вила чIавасса чIумуцIун бав­хIусса оьрмулул бутIуя: тухум, ппухълу, ичIалу, шяравусса оьрму, школа – ци бур ляличIинува дакIний ливчIсса, цайминнахьгу бусан ччи­сса?
— На ниттил увну ура октябрьданул 19-нний Хъусращиял шяраву, хъудугьул къушлий. Ттул ппу МахIаммад дяъвилул гьурттучи-инвалидри. УрчIамур каний шанма кIисса бакъассия. ТтиликIрайн щаву дирну, дяъвилия зана хьуну ия. Зана хьуну махъ зий ия колхозраву: МТФ-лул бригадирну, къурнил бригадалул бригадирну, колхозрал ревизорну, гьунар бусса чарил усттаргу ия. ЧIирай чару бишингу мунан лавхьхьухьун­ссия цала буттаяту.

Шяравучутуращал

Буттал бу­тта Адам (халкьуннаву аьрчча Адам) ххаллилсса чарил ­усттар ивкIссар, хъунмасса хIаллай Хъусращиял жяматрал юзбашинугу увчIуну ивкIссар. Ттул ни­ттил Муъминатлул, мяйва лякьлул оьрчIгу хъуни бувну, сайки царагу колхозрал давугу кьа­къариртссар. Ттул бавагу, чIявусса цаймигу шяраваллил хъами, нинухъру, жан кьацIул дургьуну, оьрмулухун зийгу бивкIун, колхозрая, хIукуматрая захIматран лавхьхьусса вари чинсса хIакьгу къаккавкнува, багьайсса кьиматгу къабивщунува, аьпалухьхьун лавгссар.

Адамхъал тухумрава дяъвилийн лавгун ия ряха адамина, инвалидталну зана хьуссар ттул ппугу, буттауссу АьбдурахIмангу. Увагу усса кIия ниттиуссива яла жагьилма, жагьилтурал бакIчи, Кубачанов ХIабибуллагь дяъвилул цIараву акъа-къатIа хьу­ссар.
Совет хIукумат дишиннин жул тухум ду-дакъашиврул мадара дузалсса бивкIхьурчан, яла, думуницIагу хьуну, мюхтажнува бивкIун бур. Ялун ливчуну къатIурчангу, ттул бу­ттан, буттал ссурвавран (бу­ттаяр хъуними) цIусса хIукумат личIину къаххирая. Бутта, хъярчирай куна, рихшантрай, колхозрал бакI дургьуминнахь тIун икIайва: «Да (пулан) ина коммунист акъарав, циван ура ина аклай?» — тIий.

АьбдурахIман-студент. 1974 ш.

Амма, ци бухьурчагу, та замана кунма тяхъасса, цаннах цаннал ччаву дусса, инсаншиву лахъсса замана цамур бучIан ххай акъара.
Ттул оьрчIнийсса чIумал Хъусращиял шяравалу дия райондалий дуккаврил ва культуралул центрну хьусса шяравалу. Дия авадансса колхоз. Жяматрал багьу-бизу хъиннува гьаз хьуна райкомрал цалчинма секретарьну зий ивкIсса шяравучу ХIасан Загълиевлул ва колхозрал председатель Буниямин Аминовлул Бабаюртливсса ва Бажиганнай­сса аьрщив зузи дурсса чIумал.
Хъусращиял дянивмур даражалул школалул цIа дия щала Дагъусттаннайх. Школалул директор ия дирисса, авторитет хъуннасса, бюхъу ххисса инсан, дяъвилул ветеран Тахакьа АхIмадов. Колхозрал дикIайва ратIин къашайсса нувщул бакIлахъру. Тахакьа АхIмадовичгу бакIчину, дарсирдаятугу мурахас бувну, бачайссияв гьарца шинал нувщи батIлан, силосру дуллан, ххулув буллан, цулун.
ХIакьинусса кьинигу дакI­нийна дур тай чIунну. Оьлла-арив нувщи батIин нанисса чIумал, жу, оьрчIал, шаппатува бягу лавсун, ахттайнсса дукай чIумал, ЧIаранеххал зуманив шювшу-къашювшугу бувну, бад­ралуву яла хъуними нувщи шахьайссия. Аьрщаращал шавхьсса бивкIхьурчангу, кIайннуяр нахIусса нувщи на тачIав къабувкуссар.

НикирацIсса кIия арснащал

[dropcap]О[/dropcap]ьрчIний ичIурасса даву дан, урттул чантай буцIин, гъа­ттара биян бан, буцин, неххайн хIачIан бан гьан – му жуй­сса бурж бикIайва. Ттун ца-цал багьайва буттарссу ЦIинпIа-ПатIул бярч лухччинийн биян бувавангу. Муних ттун буттар­ссил дулайва ца цIявхъа качарданул диялсса къурхъ. Лухччинийн бярчругу биян бувну, жу, оьрчIру, га качарданул къурхъ щаращул щинавунгу щилай, цIупIа тIий бикIайссияв. Цалчинмур классраяту айивхьуну, школа къуртал баннин, на усса классрал каялувчину икIайва ДАССР-данул лайкь хьусса учитель Билалов Рамазан Билалович. Мукунма, жуй дакI цIий, жун за лахьхьин бан хъунма­сса захIмат бивхьуссар аьпалу­хьхьун лавгсса ЯхIъяев Щайх Рамазановичлул, МахIаммадов Сяид МахIаммадовичлул, КьурбанмахIаммадов Камалу­ттин КьурбанмахIаммадовичлул, АхIмадов Исмяил АхIма­довичлул, Муслимов Ба­гъирчал, МахIачева Мариян Салмановнал, МахIаммадов Аьлил­лул, Кьудуев Рамазаннул. Хъунмасса барчаллагьрай хIакьинугу хьунаакьара на ттула учительтал АхIмадов ХIасан АхIмадовичлущал ва АхIмадов ХIамин АхIмадовичлущал.

— Школа бувккуну махъсса ххуллу язи бугьайни, ци хьуна хьхьичIунмур сававну, биялану?
— Дянивмур даражалул школа бувккуну махъ чIявуми оьрчIал, душварал пикрирду бия учительтал хьунсса. Хъунмасса асар биян бувну бия жуйн жула учительтурал багьу-бизулул.
Ттуяр ххуйну дуклакисса душру лавгуна педагогикалул ххуллийх. На ттула хъунама ­уссил документру булун увнав Дагъусттаннал университетравун, инженер-строительнал факультетрайн. ХIасил, экзаменну на дуллуссия дянивну. Нюжмардий университетравун занайгу бивкIун, урчIа абитуриент (студентътал хьунсса приказ ттигу бакъая), Мамед-Заде тIисса деканнал бавтIун, баян бувна Дубкилийсса вечерний филиалданийн гьан буллалиссару куну. Гихун къагьансса пикри хьуну, лавгра армиялийн. Къуллугъ буллай уссияв Германнаву. ТIайлану тIун бикIайсса бур «армия – это школа жизни» тIий. Тикку ттун чIявусса, оьрмулуву агьамсса затру лавхьхьуна, гусеничный самоходный паром бачин буллай, бакьин буллай, ттун диялну техника зузи дан лар­хьхьуна. На взводрал командирнал заместительну уссияв.

Армиялия кIура авну мукьах увхра Дагъпединститут­рал физикалул ва математикалул факультетрайн. Институт­раву на ххуйну дуклай уссияв, дуккаврицIун хъуннасса общественный давугу дачин дурну уссияв: группалул староста, профком, факультетрал комсорг, институтрал комсомол, комитетрал бюрорал член. Гьарца гъинттул, дартIун студентътурал кьюкьа, лагайссияв цIа дурксса, сий дусса стройкарттайн. Ххюрагу шинай ласайссия лахъсса стипендия. Мунияту на ттуйнма нава учай­ссия: «Ни от кого независимый студент», — куну.

— Цукунсса дикIан аьркинссар цайминнал бакI дургьуну ачин ччи­сса, шайсса инсаннал тIабиаьтрал лишанну, яни лидернал хасият?
— Цаманахь ва, та, кIа тIуннин, винма кIулну бикIан аьркинссар даву, цукун дайдирхьуну, цукун къуртал дан аьркинссарив, цукунсса специалистал, техника щурущи дан аьркинссарив. КIулну дикIан аьркинссар инсаннал психология, бюхъу-тяхъа. Инавагу икIан аьркинна махъ ца бусса (ца мукъуй авцIусса), марцIсса, хъяврин бакъасса, чил мукъул машан къаласайсса, вила биялалиминнайгу цIими бусса, аякьа дусса инсан. Му чIумал вийн халкь вих хъанантIиссар.

— Инава оьрмулуву бартбивгьусса мурадирттава яла хьхьичIунмину цуми хIисав бара ина? Хьурив вища щаллу дан инава тIий ивкIссаксса карьера? Ягу гъагъари хьурив?
— Дур цума-цагу инсаннал оьрмулуцIун дархIусса аькьил­сса калима: «Ува арс, дува къат­ри, бугьи мурхь» тIисса. Ттула оьрмулий ттуща хьунни шама арс хъуна ан, миннан къатри дузал дан, къатрай щябитан. ЦIана ттул ур мукьа внук, ца внучка. Минналсса буллай, ххира буллай, хъун буллай бур ттул кулпат Лиза. На хъунмасса барчаллагьрай ура ванийн, внуктурал аварашиву ттуятура цийнна ларсун буну тIий.

Совет заманнай на партиялул давурттай зий ивкIра. Ца­ппараннал учай, чичай, гьай, ттул захIматрал луттирай ца чичру дакъа дакъассар куну, пахру-ххара буллай. Амма совет заманнай партиялул насу кунийн заназисса, къагьангу къабучIисса тагьар диркIссар. Вана ттулмур карьералул сияхIгу: гьан увну, 22 гьантлий зий ивкIра МахIачкъалаллал Советский райкомрай, 3 зуруй – МахIачкъалаллал парткомрай, 8 зуруй – Кировский район дуллай уссияв. Яла 2 шинай зий уссияв обкомрал отделданул инструкторну, мичча гьан увнав кадрардал даврил отделениялийн, ми­ччагу – Лакрал райондалул цалчинма секретарьну.
На, ттинин ттула оьрмулуву хьумунийн щукругу буллай, Заннайн лаизлай икIара.

— Лакрал райондалул 1-ма секретарьну инава зий ивкIсса чIумуцIун бавхIуну ци бур бусан, ххалуйх лаххан ччисса. Шиккува цIуххиннуча, цукунсса дур коммунист системалухсса вил ябитаву – инсантурансса хъиншивуривкьай му, ягу бала-хатIасса утопиярив?
— Лакрал райкомрал 1-ма секретарьну на увчIунав коммунист партия ца яла хъунмур захIматшиврухун дагьсса чIумал. ЗахIматшиву цамургу дия: ттун даву кка­ккан дуллан багьлай бия ттуяра хьхьичI зий ивкIсса, аьпа биву, АьбдурахIман ХIусайновичлул цIаницIун дархIуну. КIанал цIа тIурча, хъинну хъуннасса сийлий ва даражалий дия. Райондалул бакIлахъия Аьхьхьахъиял (Ахвахуллал), Хивуллал районнал аьмну ларсъссаннуяр ххишаласса дия. На зузисса чIумал райондалий дуссия ттуршазарунния ливчусса яттил аьдад, шаназарунния ливчусса лухIи гъаттара. Му хъус-хъиншиву чун ларгссарив, щил жаваб дуллу­ссарив ттигу кIулну бакъассар. «Коммунист система» тIисса калима ттун хьунакъадаркьуссар. Дия социалист система, коммунистурал дачин дурсса. На цIанагу тIиссара: агарда тай социалист принципру багьайсса куццуй дугу-дурурччуну, нанигу дурну диркIссания, иш цамур кьяйдалий багьну бикIантIиссия. Лагмацири паччахIлугъирттангу уквасса кумагру къабуллай, жухава жува зий бивкIссания, Совет хIукумат тIутIайх дирчуну дачинтIиссия. ЧIалачIисса сурат – тана Китай.

— Вил пикрилий, ттинин Дагъусттаннал бакI дургьуну бивкIминнаву цума ия вина ляличIинува бюхъу ххину, лайкьну чIалачIиссану, Дагъус­ттан ххуй-хъиншиврийн буккан бан хьунсса кунассану?
— ХIукуматрал хъуними чIявуну цаннал дурмур хъиривма зия дуллалисса акъа къауккай. Ияхха жулагу ца, на акъа ттуяр хьхьичI даву дурсса Дагъусттаннай цаягу каялувчи къаивкIссар тIиссагу. Ттул пикрилий, загълунсса организатор ия М.-С. Умаханов, аькьлулул увччусса, дурккусса ия М. Юсупов, хъунасса патриот, маслихIатчи ия М.-Аь. МахIаммадов, иширттаву уздансса, дурккусса, личIи-личIисса къуллугъир­ттай зий ивкIун, республика куртIну кIулсса ия М. Аьлиев. ХIакьинуманаятугу жува хъунмурчIин гъалгъа тIунну яла махъ, ванал дуллалицири давуртту дузрайн дурккун махъ.

— Цукунсса дур Хъусращиял жяматрал дянив­сса вил занакьулушин? БувчIайрив вил буруккинтту кIайннан, кIайнналми вин?
— Ххаллилсса Хъусращиял жямат, биялну тили-хъили хьуну, чIявуми къушру шагьрурдай бивщуну бунугу, цала буттал кIану хъамабитайсса ба­къассар. Вана цIанакулгу чIявусса жагьилтал бур Хъусрахь цавай цIусса къатри дуллай, цавайгу буттахъал къатри цIу дуккан дуллай. ПаччахIлугърал кредитирттал, налогирттал политика сантирайсса духьурча, шяраваллил хозяйствалуха зунсса чIявусса гъира бусса жагьилтал бур. Дагъусттанналгу, райондалулгу бакI дургьуминнал пикри бан багьлай бур му чулухунмай. Халкьуннан даву дакъар – яла агьаммур зат ва бур.

ЦIанакул райондалул хъунаману увчIуну ур жагьилсса дурккучу – Шамил Рамазанов. Цуксса къабигьанугу, хIарачат буллай ур райондалий ххуллурду, ламурду буван, зий ур газ буцавриха. Ванангу, ванал командалунгу аьркинни хьхьу-кьини дакъа зун, халкьуннал ахIвал-хIал буссакссанияр къулай буллан.

— Цукунсса бур вил хIа­кьинусса къайгъурду? Рязину урав вила агьлу-авладрая, хьурив наслу инава тIийкунсса?
— На, пенсионер, хIакьинусса кьинигу зий ура профсоюзрал агьамсса даврий, къайгъурдугу чан бакъар. На нава бахтти бакъура тIун икIара. Нава дунияллийн укканнин ттуна къа­ккавкссар цаягу ттула ттатта, ягу хъуннабава. Амма ттул бур ххаллилсса кулпат, дурккусса оьрчIру, нава ххари уллалисса шама оьрчIал оьрчI, буссавагу ца эмарат — внучка. Ца-цал ттухьа нава цIухлан икIара, вай ттулами оьрчIругу вакссава ххира­сса биявав ттунма тIий.
Жу кулпатраву буссияв мукьа уссу ва мукьва ссу. КIия уссу аьпалухьхьун лавгунни. ЛивчIми цаннал ца хIурматрай, иззатрай, хIала-гьурттуну ялапар хъанай буру.

— Ци чIа учинна «Илчилухь», лакку кказитрал буккултрахь, лакрахь?
— «Илчи» — му бур миллатрал чирахъ. Му къачичайсса, къабуккайсса лаккучу ахIмакьри. «Илчи» вайми миллатирттал кказитирттал дянивгу ца яла сий думур кказитну бур, мунил аьч дуллалисса материаллу агьамсса, авадансса дур. «Илчи» на чичлай уссара цалчинмур номердания айивхьуну. Ва кказит сававну ттунма хъамабитавайсса ла­кку мазрай буккин ва чичингума ххишалану лавхьхьунни ттун.

Хъунмасса барчаллагь тIий ура редакциялул зузалтрахь, цила чIумуй кказит, дузалгу бувну, буккултрачIан тIайла буклакисса. Нава зузисса кIанттурдайгу на кказит бу­ккан буллалисса давриха зий ивкIссара. Ттун кIулли цукун­сса захIмат буллан аьркинссарив ваксса хъунмасса кказит сакин бан. Зухьхьун цIуллушиву дулуннав!

Ихтилат бувссар
Имара Саидовал