[dropcap]О[/dropcap]ктябрь зурул 2-нний ДР-лул аьрали комиссариатрай хьунни ссуттил призыврал хIакъиравусса пресс-конференция.

А. Аьбдуллаева
ДР-лул аьрали комиссар Дайтбаг Мусттапаевлул бувсунни ссуттил Аьралуннаву къуллугъ буллан Дагъусттанная 3075 жагьил уцинтIишиву. Вай хъанай бур инттусса призывраяр 120 инсан ххишалану. Вай ба­къассагу, контрактрай къуллугъ буллан буцинтIий бур азарунния ливчусса инсантал. Контрактрай къуллугъ буллан буцайссар аьралуннаву къуллугъ бувссагу, къабувссагу жагьилтал, ларайсса ва дянивсса хасъсса кIулшивуртту ларсъсса.

Ссуттилсса призыв най дикIантIиссар январь зурул 1-ннийн бияннин. Аьралуннавун уцинтIисса 3075 инсаннава 200 инсан къуллугъ буллантIий бур Национал гвардиялул аьралуннаву. Гьашинусса шинал рес­публикалул ва районнал аьрал­и комиссариатирттал аьралуннавун буцинтIисса жагьилтурая 820 инсан тIайла увккун ур аьра­ли пиша лахьхьин. Миннава бачIи къуллугъ буллай бур, бачIи уттиния тихунмай тIайла буккантIий бур къуллугъ буллан. Жагьилтал аьралуннавун буцаврицIун бавхIуну сакин бувну буссар аьралуннавун буцлациминнал нитти-буттал комитет, мукунма сакин бувну буссар призыврал комиссиялул давриву гьурттушинна дуллансса, шяраваллал бакIчитурая ва депутатътурая, школалул директортурая ва учительтурая, жяматийсса организациярттал ва диндалул вакилтурая сакин бувсса поручительтурал институт.

Шивун духлахиссар арулла жяматий­сса организация. Миннахь ихтияр дуссар райондалул, шагьрулул ва республикалул призыврал комиссиялул заседаниярттай гьурттушинна дан.
ХIакьинусса кьини призыврал комиссиялийн бучIан аьркинсса 50 азарунния ливчусса жагьилтал бур. Миннава, циняв тIалавшиннардахгу бурувгун, язи бугьантIиссар аьралуннаву къуллугъ буллан тIайла бу­кканми.

Гьашинуния тихунмай вузирдаву дуклакисса студентътуращагу бюхъантIиссар, ччай бухьурча, цала отсрочка ишла къадурну, институтравату аьра­луннавун гьан. Цинявппагу аьралуннаву къуллугъ бан буцлаци­сса жагьилтал ххалгу бантIиссар, къачагътурал кьюкьращал цукунчIавсса дахIаву дурив-дакъарив кIул бан.