Каспийскалий хьунни ОМОН «Скорпион» сакин хьуну 20 шин шаврин хас дурсса шадлугърал мероприятие.
Подразделениялул зузалт барча бан бувкIун бия Нацгвардиялул Ухссавнил Ккавкказуллал округрал хъунаманал хъиривчу, генерал-лейтенант Сергей Власенко, Дагъусттаннал управлениялул хъунама, генерал-майор МахIаммад Баачилов, Дагъусттан Республикалул ХIукуматрал председательнал хъиривчу Рамазан ЖахIпаров, региондалул полициялул хъунама АхIмад Кулиев, Дагъусттаннал МЧС-рал министр Нариман КазимахIаммадов.
— ХIакьину жува кIицI лаглай буру округрал ца яла хьхьичIунмур подразделение сакин хьусса кьини. «Скорпион» отрядрал гьану бивзун бивкIссар ванияр 20 шинал хьхьичI, Дагъусттаннай захIматсса тагьар дусса чIумал. Тания шихунмай отрядрал аьралитал гьуртту хьуссар ацIвахъул хасъсса операциярттай ва хIакьинусса кьинигу региондалий паракьатшиву дуруччаврил къаралданий бавцIуну буссар, — увкунни цала ихтилатраву генерал-лейтенант Власенкол.
Шадлугърал мажлисрай гьуртту хьунни отрядрал ветерантал, М. ХIажиевлул цIанийсса Хьхьирил кадетътурал школа-интернатрал ва Г. Трошевлул цIанийсса Дагъусттаннай цалчин тIивтIусса кадетътурал школа-интернатрал оьрчIру, аьралитурал кулпатру, къуллугърал бурж биттур буллай жанну дуллуминнал щахъами.
ХьхьичIунсса зузалтран дуллунни личIи-личIисса наградартту: «Участник боевых действий» лишанну, «За отличие в службе» медаллу, «Заслуженный работник правоохранительных органов» цIарду ва бахшишру. Баян бунни барчаллагьру.
— На дакI дарцIуну ура отрядрал зузалтраща цала хьхьичI бивхьусса ччимур масъала бартбигьин бюхъаншиврий, — увкунни МахIаммад Баачиловлул, аьралитал барча буллай.
Отрядрал аьралитурал ккаккан дунни хъамаллуран цала техника ва ярагъ, тIивтIунни «полевая кухня».
Шадлугърал мажлис къуртал хьунни подполковник Василий Бурмистровлул каялувшиндаралусса Нацгвардиялул Ухссавнил Ккавкказуллал округрал ансамбльданул концертрайну.
