2000 номер – му чанссарив ягу чIявуссарив? Цумур чулуха хIисав ласурчангу къачанни.
28 шинал лажиндарай «Илчилий» рирщуссар 130 000-ннияр ххишаласса макьалартту, чIяруми лакрая бусласисса.
Аьрасатнал хъунмур энциклопедия сакин бувну буссар 80000 къабивсса статьярттайну. Вайксса статьярттайну сакин бувсса Аьрасатнал энциклопедия хъунмунин ккалли буллай бухьурчан, учин бюхъанссар – «Илчигу» хъанай бур Лакрал хъунмур энциклопедия, цуппагу ниттил мазрай чивчусса куну.
Р. Къардашов
[dropcap]Л[/dropcap]акрал яла агьамми, гьануми, аьрщарал, щинал, газрал, ххуллурдал масъаларттая байбивхьуну лакку мазрал, дуккаврил, багьу-бизулул, мяърипатрал , бивкIу-буккулул масъаларттайн бияннин гьаз буллалиссар «Илчи» кказитрал.
«Илчи» бур лакрал буккултралгу, бакI дургьуминналгу, каши думинналгу дянивсса ххуллу, дянивчу, маслихIатчи.
«Илчи» бур кьурчIи-ххарисса хавар ужагърайн биян байсса вакил, ихтивар, тилчи.
«Илчи» бур лакрал оьрмулул дагьани, цайми миллатирттал хьхьичI ккаккан дан лайкьсса лакрал лажин.
ТIайлассар, «Илчи» лакрал рухI дусса кказит бухьурчангу, ва зий буссар СМИ-рдан багьайсса кьанундалул гьанулий. Уссар кказитрал учредитель – ПаччахIлугъ, буссар ялув бивхьусса бигарду щаллу бан аьркинсса буржру.
Ци бухьурчагу, учредительнал тапшур бувмур бартбигьлагьийни кказитрал бугу-бугьайссар ва багу-бачайссар лакрал рухI, симан, чIу, кьанкь дусса ххуллийх.
Ххирасса, хIурмат лавайсса буккулт! 2000-рилва «Илчилийн» зула ужагърайн хъамалу оьвкусса, хъамал ххирасса, жул хьхьичI дарвазартту тIивтIусса зун хъунмасса барчаллагь.
Октябрь зуруя дайдирхьуну тIиртIуну дуссар 2020-ку шинайнсса «Илчилул» подписка.
Лакку кказит зуща бучIан бан хъанахъиссар кIива ххуллу-ххуттайх.
УФПС-райх
ДачIи шинайсса багьа – 396 къ.
Шинайсса багьа – 792 къ.
Дагпечатьрайх
ДачIи шинайсса багьа – 182 къ.
Шинайсса багьа – 364 къ.
Ххирасса лак!
Цуксса щаллагу дунияллийх сахаватлувну кIама бивщусса кунма жува ппив хьуну бухьурчангу, цуксса лакку маз бухлагаврил ялув буруккинтту булларчангу, дакI дарцIуну ура жува ягу жул хъирив нанисса варистурал кьамул бантIишиврий «Илчилул» 3000-мур номергу.
«Илчилул» буккултрахьхьун цIуллушиву дулуннав, каши-кьудрат чан къаданнав, лакку кказит ккалансса гъира къалещаваннав. Бюхълай личIаннав!
Ябаннав лак Заннал!
