[dropcap]Л[/dropcap]акрал театрданул тамашачитураву ушиву къакIулли цучIав Дагъусттаннал лайкь хьу­сса артистка Халисат Батирбековал балай къабавссагу, ванил цила кIюла-лахъи чIуний бюх­ттулну ва бюхханну щаллу бай­сса лакрал халкьуннал балайрду къаххирассагу.

Гьашину Халисат цила оьр­мулул ккуркки-щаллусса юбилей хьунадакьлай бур. Мунияту на, Халисат барчагу бувну, ванин щала оьрмулул лахъишиврий­сса цIуллушивугу, чIярусса ххаришивурттугу чIа тIий, дакIнин бутан ччай бура Халисатлул театр­данувусса хьхьичIва-хьхьичIсса шаттирдугу, ванил дургьусса роллугу, гихуннайсса даврил хIакъиравусса пикрирдугу.

Халисат бувкIун бур Лакрал театрданувун ванияр 27 шинал хьхьичI. На цIувххуссия Халисатлухь: «Вила балай учаврил гьунар бушиву та ялун ливчуна, ина чIивинийгу учайссияв балай?» – куну.
Халисатлулгу аьч бувна дакI­нивумур.
— На Уручлав школалий дук­лакинийва Лакрал театрданул цавагу спектакль къакьабитай­ссия. Ттун гъира багьуна театрданул даврих, на, мивусса машгьурсса аьртисткIахъал учайсса балайрду дакIних лавхьхьуну, шаппа чIаххув душваращал концертру дуллайгума бикIайссияв. Школалий ккалаккийнива школалул самодеятельностьравугу гьур­тту шайссияв. Ттуву мудангу нава театрдануву зунна тIисса пикригу, гъирагу бухкъалагайва. Амма, чIявусса халкьуннал хьхьичIун бувккун, балай учин, къавтIун бизан, роль дугьан аьркиншиву дакIнин багьукун, щала сисаву духлагайва.

Халисат жула тамашачитурал дянив хьхьичIва-хьхьичI машгьурнугу, бусравнугу бур цила учай­сса балайрдайну. Ванил ляличIисса такьвалий щаллу бай, бутта­хъал бусалардал кунна, жула хьхьичI миллат­рал хасиятгу, тарихгу бацIан буллалисса балайрду.

Школа къуртал бувну махъгу, нигьа буслай, театрданул хьулувух буххан зурзу тIун бикIайвав. Мунияту на тамансса шиннардий личIи-личIисса идарарттай зий бивкIра. Гьанжилив бивзукун, 22-мур школагу къуртал бувну, бувхра Музыкалул училищалул хорданул отделениялийн. Амма, мугу къуртал къабувнува, 2 шинай на зий буссияв «Авадан» ва «Ватан» тIисса ансамбльлаву. Миннал Москавлив гастроллу дусса чIумал тих сольнайсса вокалгу щаллу дуллай бикIайссияв…

Амма Халисатлул дакIмур ялагу лаллай къадиркIун дур, театргу, мунил сценагу макIра ккак­лай бивкIун бур. Театрданувун­сса шачIануну хьуну бур гай шиннардий Чичултрал союзрачIа тIивтIуну бивкIсса «Литературалул театр». Ми­кку Халисат гьур­тту хьуну бур «Ккурккуллал Щаза» тIисса пьесалуву.

— Му чIумал бувчIуна театр­данул тIингу, тIааьнгу, чIалангу бивкIуна театрдануву дакъа ттула дакI дигьакъалагантIишиву, — тIий бур Халисат.
Чурххалгу, бакIралгу бювхъусса, балайлул ва къавтIаврил гьунаргу бусса лакку душ театр­данул хъунама Валерий Эфендиевлул ххарину кьамул бувну бур. Вас-ццахлий байбивхьусса Халисатгу, хIалли-хIаллих тIий сислай, хIала бухлай хордавухгу, массовкарттавухгу, театрданул оьрмулущал дус хъанан бивкIун бур, гивусса низамрай къуццу тIий. ХьхьичIра-хьхьичIсса роллугу, хьхьичIра-хьхьичIсса концертругу, хьхьичIва-хьхьичIсса гастроллугу хьуну бур Халисатлун экзаменнунугу, артистурал кулпатравун буххавунугу.

Ялу-ялун гьарза хъанан диркI­ссар Халисатлул роллал аьдадгу. Цал – массовкар­тту, яла – мюрщисса эпизодру, залдануясса нигь чан-чанну тIий духлаглан диркIукун, Халисатгу жура-журасса, цанниха ца къалархьхьусса хасиятирттал роллу щаллу дуллан бивкIссар. Ми бивкIссар жагьилссагу, бугьарассагу, аьтIиссагу, хъяхъиссагу, талихI буссагу, бакъассагу, кьянкьа­ссагу, кIукIлуссагу хъами. Хъинну дакIний личIансса роллуну хьуссар, цила талихIрал цIаний ссурварайн данди бавцIуну, биянгу хIадурсса, «Бернардал къа­тта» тIисса Ф.Г.Лоркал пьесалувасса Ангустиаслул ролгу, «Камаллул Башир» тIисса Абасил МахIаммадлул пьесалувасса ласная кьюлтIну Баширдухсса эшкьилул ччучлачисса КIихIилайл ролгу, Ватандалул цIаний жан дулун хIадурсса, арамтуращал архIал ярагъгу кIунттил бувгьуну душманнайн данди бацIан бувксса «Хан-Муртазяли» тIисса ЦI. Камаловлул пьесалувусса ПатIиматлул ролгу.

Дур ванил дургьусса роллаву кIукIлусса, янусса хасиятругу. Мукунссану бур «Меж диркIсса тIутIив» тIисса Д. Жабарлил пьесалувасса Паригу, «Щялмахъсса къашайшала» тIисса Ж.Б.Мольердул пьесалува­сса Беллинагу, «Машади Ибад» тIисса У. ХIажибековлул пьесалувасса Гюльназ-бикагу.
ЧIярусса дургьунни Халисат Батирбековал магьрал персонажтурал роллугу: «Мусил аьнакIул оьрчI» тIисса В.Орловлул пьесалувасса макрузан цулчIагу, «Сулмалагуз» тIисса К.Мазаевлул магьлувасса аькьлукар Исугу, Б.Кулунчаковал «КIяла арнил бусала» тIисса пьесалува­сса ХIусуд шаттагу ва мукунна цайми-цаймигу.

Халисат Батирбекова жула тамашачитурал дянив хьхьичIва-хьхьичI машгьурнугу, бусравнугу бур цила учайсса балайрдайну. Ванин цинмагу ххирар балайрду, халкьуннангу ххирар Халисатлул ляличIисса такьвалий щаллу байсса, буттахъал бусалардал кунна, жула хьхьичI миллатрал хасиятгу, тарихгу бацIан буллалисса балайрду.
Халисатлул хияллугу бюх­ттулсса бур, ванин ччай бур сценалий – балайлийну бакъа, инсантурал кьадардайнугу халкьуннал багьу-бизулул лишанну, суратру хьхьичI дацIан дуллан.

«Вила яла хъунмур мурад ци бур, цукунсса роллу дугьан ччива?» куну цIувххукун, Халисатлул, ваца цакьнивагу муния гъалгъа тIий бивкIсса кунма, увкуна:
— Ттун ччива Анхил Мариннул, Анна Каренинал, Ва­сса Железновал роллу дугьан. Ттун оьр­мулул тIингу, тIааьнгу бувчIай, ттунна ччисса роллу хIадур дуллалийни, гай сценалий ккаккан дуллалийни. Балай тIутIийни тIурча, на левххун нанисса кунма бикIара, леххаву тIий, балай тIий. Ттун ттулла давугу, театргу, шивусса циняв артисталгу дакIнихтуну ххирар, ттун вай ттула уссу-ссурвалну чIалан бикIай. Зунгу ххирар, хьхьу-кьини къаувкуну, ххирар шяраваллавун­сса гастроллугу, кIиккусса жула халкьгу. Яла хъунмур ттула мурад щаллу хьушиврун ккалли бара нава миллат­рал театрдануву зий бушиву.

Укунсса ихтилат хьунни утти­гъанну ттулгу, Халисатлулгу дянив, ванил оьрмулул юбилейрал гьантрай.
Барча, Халисат, вил юбилей! ЧIа тIий бура вин цIакьсса цIуллушиву ва чIярусса ххаришивуртту, талихI-тирхханну ва винна ххирасса роллу щаллу дуллансса кашигу, кьуватгу!

Гулизар
Султанова