[dropcap]О[/dropcap]ктябрь зурул 8-нний МахIачкъалаллал аэропортрайн дуркIунни республикалул санитариялул авиациялунсса цIусса Ми-8АМТ вертолет.
Дагъусттаннал ЦIуллу-сагъшиву дуруччаврил министерствалун санитар вертолет дуллунни «Здравоохранение» миллатирттал проектрал лагрулий.Вертолет дуркIсса чIумал, му ххал дан аэропортрайн бувкIунни Республикалул БакIчи Владимир Васильев ва цIуллу-сагъшиву дуруччаврил министр Жамалуттин Ибрагьимов.
Имара Саидова
[dropcap]В[/dropcap]ертолетрай дур, медициналул идарарттай куннасса, захIматсса тагьарданувун агьсса инсан медициналул кумаграл щаллу ан бюхъайсса цинярдагу шартIру дузал дурну.
— МукIруну ура ва вертолетрал кумаграйну цикссагу инсантурал оьрмурду ххассал бан хьунссар тIий.
ЦIуну кьамул дурсса, цинярда шартIирдал дузалсса вертолетрай апатIру хьусса, ягу захIматсса тагьар дусса инсантуран анаварсса мутталий медициналул кумаг баву му агьамсса ишри, — увкунни Владимир Васильевлул.
Жамалуттин Ибрагьимовлул бусаврийн бувну, ва вертолетрай, архсса кIанттурдая апатIру хьусса инсантал буцаву дакъассагу, бюхълай бур, азарханардай кунма, медициналул лавайсса даражалул кумагру бан.
Ухссавнил Ккавкказнаву Дагъусттан хъанахъиссар санитар авиация хьхьичIуннай даврил программалул лагрулий вертолет дуллусса цалчинсса регионну.
ЦIусса вертолетращал Дагъусттаннайн увкIунни Санитар авиациялул миллатирттал къуллугърал директор Александр Мацук. Вертолетирттай лехлантIиссар санитариялул авиациялул компаниялул пилотътал. Гихунмай вай пилотътурал леххан хIадур буллантIиссар жула авиакомпаниялул летчиктал.
МахIачкъалаллал аэропортрая ва вертолет леххан хIадурну дикIантIиссар аьркин багьсса кIанттурдайн.
ДакIнийн бутанну, Дагъусттан санитариялул авиация хьхьичIуннай даву мурадрайсса программалувун дагьсса 49 региондалувун бухлахишиву. Ва программалул мурад хъанахъиссар архсса зунттал щархъавусса инсантал анаварсса медициналул кумаграл чIун-чIумуй щаллу баву. Рейсру дуллантIиссар 85% санитариялул авиациялул проектран ккаккан дурсса арцуйну ва 15% кIанттул бюджетравасса арцуйну.
