[dropcap]В[/dropcap]ай гьантрай МахIач­къалалив хьунни щалагу Аьрасатнал интернет-форум «РИФ. Кавказ». Ваний гьур­тту хьунни Аьра­сатнал цифрардал лябу­ккулул, дахIаврил ва агьалинан­сса коммуникациярттал

министр Константин Носков, ДР-лул ХIукуматрал Председатель Артем Здунов, ДР-лул информатизациялул, дахIаврил ва агьалинансса коммуникацияр­ттал министр Сергей Снегирев, цIузаманалул технологиярттал ялув зузисса къуллугъчитал, аьлим­тал, экспертътал.

---

Форумрай цала проект «КIул­шивурттал къатта» («Дом знаний») ккаккан бу­ву­нни жагьилсса аьлимчу ГьунчIукьатIрал шяравату­сса Халипа ТIагьировлул. Халипанал проект ххув хьуссар Да­гъусттаннал БакIчинал баян бувсса проектирдал конкурсрай. «КIулшивурттал къатта» тIисса проектрал гьанулий бур онлайн-школа. Ва бучIи лякъин най бур мушакъатминнан, школалийн занан къахъанахъиминнан, думур кIулшиврий гьашиву къадурну, мунил даража лахъ бан ччиминнан.
Онлайн-школалий бур элект­рон библиотека, оьрчIал психологиялул ххал дигьаву, дуклакаврин ва лавхьхьумунин кьимат бищаврил электрон система. Цифрардал технологиялул кумаграйну кIулшиву ласаврил ялув бавцIуну буссар лавайсса даражалул учительтал.

Халипа буслай ур: «Ва школалий гьарцагу дуклаки оьрчIал дакIничIан ласунтIиссар къулайсса кIулшиву дулаврил кьяйдалул ххуллу».
Аьдатрайсса школарттах бурувгун, цIузаманнул онлайн-школарттал дур хъиншивуртту, амма духьун­ссар диялдакъашивурттугу. «КIул­шивурттал къа­тта» он­лайн-школалул сайтрайн багьукун (domznany.shool), цанничIа ца дишин хьунтIиссар школалул ва онлайн-школалул тапаватшивуртту.

Р. Къардашов