[dropcap]М[/dropcap]оскавливгу, Аьрасатнал Президентнал биялдарайсса Дагъусттаннал Постпредстволий, хьунни Дагъусттан боевиктурацIа марцI бувну 20 шин шаву кIицI лаглагисса мероприятие.
Дайдихьу дуван ккаккан бувна 1999 шиналсса иширттая бусласисса «Гьунарданул маршрутру» тIисса киносуратравасса лахIзарду. БавтIцири барча буллалисса ихтилатгу бувну, Дагъусттаннал Постпреднал цалчинма хъиривчу ХIамзат ХIамзатовлул бувсунни республикалул БакIчи Владимир Васильевлул ва Постпред Жамалуттин ХIасановлул цIардаяту барча буллалисса адресру дуркIшиву.
Генерал-полковник Леонтий Шевцовлул цалвамур ихтилатраву чIурчIав дуруна тай шиннардий Дагъусттаннал агьулданул, кьянкьану бавцIуну, Аьрасатнал билаятрал цIа дурурччушиврий. ЛивтIуцири дакIнийн бичлачисса, вирттаврал аьпа уттава буллан аьркиншивриясса бия ихтилатру. Фойелуву дия та чIумалсса иширттал суратирттал выставка. Ахирданий цинявннайх Эльмира Кожаевал «1999 шин репортёрнал ярунних» тIисса луттирдугу бавчIуна.
П. Рамазанова
