ГТО дулаврил республикалул спартакиадалий

[dropcap]О[/dropcap]ктябрьданул 19-нний МахIачкъалалив, Елена Исинбаевал цIанийсса стадиондалий, шадлугърал тагьарданий тIиртIунни республикалул паччахIлугърал граждан къуллугъчитурал дянив ГТО-рал комплексрал нормативру бартдигьаврил спартакиада.

Муний гьуртту хьунни ДР-лул Халкьуннал Мажлисрал Председатель Хизри Шихсаидов, вице-спикер Камил Давдиев, депутатътал.


ХIасан Аьдилов
ГТО-рал нормарду бартдигьавривух гьуртту хьунни циняв министерстварттал ва идарарттал зузалт.
Спартакиадалий махъ лахълай, Хизри Шихсаэдовлул бувсунни Дагъусттаннай чIявусса спортсментал бушиву, минная эбрат ласлай, жунмагу аьркинну бушиву жулла цIуллушиву дуруччин, спортращал дусшиву дан, ГТО-рал нормарду дулаврия тIайла хьуну.

Шадлугърал парадрай гьур­тту хьуминнахь аьла-ссалам буллалисса махъру лавхъунни Камил Давдиевлул ва ДР-лул спортрал министрнал хъиривчу Зайнал СалахIуттиновлул.
Яла ГТО-рал нормарду биттур дурминнан дуллунни хасъсса лишанну. Муния махъ ккаккан дунни концертгу.

ГТО-рал тестру бартбигьлай бия стадиондалул личIи-личIисса площадкарттай. Тестру хIадур бувну бия инсантурал оьрмулул шиннардих бурувгун. Оьрмулул яла бугьарамур бия 70 шинавусса хъамитайпа.
Спартакиадалий гьуртту хьунни жул зузала Руслан Къардашовгу.