Жижара

Шагьрамазаннул душ Мутаева Шюъбанат

[dropcap]З[/dropcap]ахIматсса цIуцIаврища хха­ссал къавхьуну, лавгунни дунияллия захIматрал ветеран, ххаллилсса хъамитайпа, Ккуллал шяраватусса Шагьрамазаннул душ Мутаева Шюъбанат.

Шюъбанат бувссар 1939-ку шинал Ккуллал шяраву Оьр­гъухъал Шагьрамазаннул кул­пат­раву. Ххуйсса кьиматир­тта­щал Ккуллал дянивмур даражалул школагу къуртал бувну, оьрмулухун Шюъбанат зий бивкIссар дахху-ласулул даврий. АцIрахъул шиннардий зий бу­ссия Ккуллал райпорал ттучандалий. Шюъбанат цимилагу лайкь хьуну бур райондалул ва республикалул чулуха­сса ХIурматрал грамотарттан ва бахшиширттан.

Жагьилсса оьр­мулий аьпалу­хьхьун лавгсса ласнал бивкIулул дардгу чувшиврий дурхIуну, яхIгу кьацIул бувгьуну, цинмалу оьрчIал къайгъурдалсса буллан багьссар ванин. ДурхIуссар Шюъбанатлул оьр­мулул нязаннив, апатI хьуну, оьрмулуцIа хьусса арснал хажалатгу.

Ва бия гьарца чулуха бюв­хъу­сса хъамитайпа. Шюъ­ба­натлучIан маслихIат цIуххин, дакI кIида­чIин бучIайми чан къашайссия.
Шюъбанат дунияллия лагаврил кьурчIишиву кIидачIлай, жижара буллай буру ванил арсурваврахь, душваврахь, куявтурахь, арснал хъаннихь, уссурваврахь, гъан-маччацириннахь. Алжаннул ххари буваннав, гьа­ттай нур дизаннав! Шюъбанатлун къабуллумур оьрмулул бутIа наслулун ххибувну лякъиннав!
Ккуллал жямат


Аьзизсса ссу дакIнин бутлай

[dropcap]В[/dropcap]ай гьантрай 8 барз хъанай бур ттул цабакъа-ба­къасса, аьзизсса ссу Айдаева РайхIанат ахиратравун лавгун.

Жижаралун кIанай

РайхIанат бувссар ЧIяйннал шяраву Аьлил­лул ва ХIаписатлул кулпатраву. РайхIанатлун 8 шин ду­сса чIумал, ппугу дяъвилийн лавгун, ванил нину 4 оьрчIащал лирчIссар. Ванин багьссар гьарца ниттил дайсса давурттавух хIала буххан, чIивисса оьрмулий чIявусса ккавкссар, канил къадургьусса касму къалирчIссар. РайхIанат буссия гьарцаннащал дакI тIиртIусса, хъамал ххирасса. Зий бикIайссия клубраву, библиотекалий, ОНО-рай, интернатрай дукра дувуну. Махъсса шиннардий зий буссия мува пишалий райондалул азарханалий, 40 шин дурссар шикку зий. Аллагьнал чивчумунила буккан къашайссар. БивкIу кьурчIири цумур бунугу. Оьрму бур жунма буржирай буллуну. Ттул ссин алжан нясив баннав, гьав нурданул дуцIиннав.

Гъав лагаву цирвав?

Гъав лагаву цирвав
ттул буттал къатлул,
КIачIа шаву цирвав
ва хIаятралгу,
РухI дурксса хханссархха
гьарца затрава –
Ядуллай диявав
ттул ссил ссихIирал.

Дарваза тIивтIуну,
та буххарчагу,
Ххуллийн буккайссия
ттул ххирасса ссу,
ТIиртIунна дикIайсса
вай кIяла нузру,
Кьункьуллив дирхьуну,
дуснакь дурну дур.

Ттула ссу щябикIай
чIиви къатIуйгу
ЩябивкIун бура на
ттунма навалу,
Наваксса къуману
уривав цукIуй,
Гьартасса дуниял
ваксса цIан ларгун?

Цакуну чIу хьуна хIаятравату,
Цу уривав куну,
тIанкI куну бивзра:
Цуя шавай уххан,
ссу бакъа буна –
Цуйра цурда тIиртIсса
нузкьун ляркъуна.
Басират Мамедова,
ш. ЧIяйми