Яданну буттахъал мина

[dropcap]С[/dropcap]ентябрь зурул 20-нний Ххюлуссуннал школалий хьунни цIуну директорну бивтсса Заира Абачараевал школалул коллективращалсса хьунабакьаву. Миккун бавтIун бия Ххюлуссуннал школалул учительтал ва школалий дуклай бивкIми.

[dropcap]З[/dropcap]аира Ххюлусмав зун бу­чIаннин чIярусса шиннардий зий буссия МахIачкъалалив 30-мур школалий завучну. Ва бур лаваймур категориялул муаьллим. Цила ихтилатраву Заирал кIицI бувна цуппа мудангу Лаккуй яхъанан ччай бивкIшиву. «Вания тихунмай на буттал шяраву личIан ччай бура», — куна ванил.

Ихтилатру бувна школалул завуч Аьли Дибировлул, ПатIимат Аьбдуллаевал, Аьлият Акаевал ва м.ц.
Ихтилатру буллалиминнах вичIи дишайхту, чIалай бия къачIирисса душиву ххюлуссуннал цалла шяраваллихсса ччаву. Мяйжаннугу, Ххюлуссуннал шяравалу дур ляличIисса.

[dropcap]Ч[/dropcap]чимир-Ххяллуяту шяраваллих урувгукун, ччан бикIай, ниттичIан чIиви оьрчI куна, бачIва ччаннащал ачин. Гьарца жул шяравун увкIсса инсан икIай хIайран хьуну шяраваллил тIабиаьтрай. Ххюлуссуннал жяматгу кувннащал кув бавкьусса, хIурмат-иззат бусса даражалул инсантал бур.
Ттула пикрилий, Аллагьна­чIансса ххуллугу Буттал Ватан­далийхчIинсса бухьунссар. Ва оьрмулуву яла лахъми затру дур Ватан ва нину-ппу, ми бу­ссаксса оьрмулуву бур тIивтIуну мукьвагу мурцIу. Буттал кIану буссаксса ина талихI бусса инсанна, му ябавугу мубараксса бурж бур.
Цала Буттал кIанттухсса наз­мулуву лакрал чичу, шаэр Абакар Мудунов тIий ур:

Ина гъанна бургъичIан,
Оьрмулул хIакьмуничIан.
Нава вила арс ушиву –
Гьар му талихI бушиву.

ХIакьинусса кьини чIявусса инсантал бур шагьрурдайн бизлай, хъамаритлай цала ххаллил­сса минагу. Шяравусса оьрму, замана ци бунугу, баххана къашай, инсантурал арагу уздан­сса, кувннащал кув ххаллилсса дикIай.
Мероприятиялул ахирданий цинявппа щябивкIуна ссупралух, бувна чяйлухунсса ихтилатругу.
ТIайлабацIу баннав вин, лайкьсса зунттал душ Заирай!.

Кьурбанисмяил Амиров,
ш. Ххюлуссун