[dropcap]С[/dropcap]ентябрь зурул 30-нний «Каспий» санаториялий дайдирхьунни Дунияллул халкьуннал ва диннал дянивсса ирглийсса 6-мур форумрал даву.
П. Рамазанова
Аьрасатнал регионнаятусса ва кьатIаллил билаятирттаятусса 150 инсан гьуртту хъанахъисса ва форумрал дайдихьу дуллалисса мажлисрай гьуртту хьунни: Дагъусттаннал ХIукуматрал ва БакIчинал администрациялул хъунама Владимир Иванов, ХIукуматрал хъунаманал хъиривчу Рамазан Жяъпаров, Дагъусттаннал БакIчинал кумагчи Камил Ланда, национал политикалул ва диндалул иширттал министр Энрик Муслимов, жагьилтурал иширтталсса буллалисса министр Саэд Камилов, Халкьуннал Мажлисрал хъунаманал хъиривчу Елена Ельникова, Дагъусттаннал муфти АхIмад-хIажи Аьбдуллаев, МахIачкъалаллал ва Грознайлул Архиепископ Варлаам, Дагъусттаннайсса ягьудинал ккурандалул хъунама Валерий Дибияев ва цаймигу вакилтал.
Дагъусттаннал БакIчи Владимир Васильевлул цIаниятусса барча буллалисса телеграмма дурккунни Владимир Ивановлул. Ванал кIицI лавгунни жагьилтал цалагу, чилгу хIурмат буну къуццу тIуншиврул рувхIанийсса ххазинардал гьанурдай тарбия буллан аьркиншиву. АхIмад-ХIажинал, Варлаамлул ва Валерий Дибияевлул ихтилатирттаву кIицI лавгунни форумрал цал ттигу исват буллалишиву республикалул агьали диннал ва миллатирттал хIурмат буну, бавкьуну занакьулу хъанай бушиву ва жагьилтал къаххуймуния байщун бувавриву диндалул бияла хъуншиву. Халкьуннал Мажлисрал хъунама Хизри Шихсаэдовлул цIанияту форумрайн бавтIцири барча буллалисса ихтилат бунни Елена Ельниковал. Ва форумрал лагрулий хьунни динну ва миллатру личIи къабуллай яхъанан аьркиншиврул хIакъиравусса агьамсса ихтилатругу, спортрал тIуркIурдугу, экскурсиярду ва тренингругу, экологиялул акциярдугу, машгьурсса политиктуращалсса ва махъ нанисса инсантуращалсса хьунабакьавурттугу.
