[dropcap]О[/dropcap]ктябрь зурул 3-нний Да­гъусттаннал региондалийсса «Единая Россия» партиялул председатель Дмитрий Медведевлул приемныйлуву

агьали кьамул бунни АьФ-лул ПаччахIлугърал Думалул депутат Аьвдулмажид МахIрамовлул. Депутатнал ва кьини кьамул унни личIи-личIисса масъалар­ттащал увкIсса 13 инсан.

---

Имара Саидова
[dropcap]М[/dropcap]ахIачкъалалив ялапар хъанахъисса Ттупчиева ТIагьират аьрзирай бувкIун бия май зуруй дурну къуртал дан аьркин­сса къатри лахъи лаган дуллалисса строительствалул компаниялийн. Ванил бувсунни къат­ри даврих арцу бакIрайра дуллушиву ва компаниялул хъунама, цалва буллусса махъ бацIан къабувну, телефон гьаз къадуллай, лаикIлай ушиву. Депутатнал ТIагьират Ттупчиевал ихтиярду дуруччаву ва мунил масъалалул хъирив лаяву тапшур бунни юристнайн.

Гергебиллал райондалий­сса Аймаки шяраваллил бакIчи Руслан МахIаммадов увкIун ия депутатначIан, оьрчIал багъраву ххишаласса группарду тIитIин кумаг бувара тIий. МахIрамовлул ва масъалалул чIарав ацIаву тIалав буллалисса хIукму тIайла бувккунни Гергебиллал райондалул бакIчинайн.

ЧIарадиял райондалия­сса МахIаммад Муртазааьлиев увкIун ия «Шалиб» СПК-лул председательнаясса рязи акъашивурттая бусан. Дагъусттаннал Минимуществалул чулухасса ихтиярду дакъанна, СПК-лул арендалий ризкьилун итадаркьусса аьрщив цайминна­хьхьун ишла дан дуллай усса ур председатель. Мунийн бувну, кооперативравусса зузалтраща шяраваллил хозяйствалун итадаркьусса аьрщив зузи дан хъанай ба­къасса бур. Депутатнал ва масъалалул хIакъираву хъирив лаяву мурадрайсса чагъар тIайла бувккунни хасъсса министерствалийн.
Аьвдулмажид МахIрамовлул кIицI лавгунни цачIанма ва кьини бувкIсса агьалинал масъалартту, цала бакIрайн лавсун, дузал баврил ялув ацIантIишиву ва миннул хIасиллая ккаккан дурсса чIумул мутталий баян бантIишиву.