[dropcap]В[/dropcap]ай махъсса шиннардий аьдатравун дагьунни октябрьданул 21-нний Дагъусттаннал культуралул ва миллатирттал мазурдил кьини кIицI лагаву.
Ва иширан хасну ДГПУ-рал дагъусттаннал филологиялул факультетрайгу лакрал, яруссаннал, лазгиял ва табасараннал мазурдий диктантру чирчунни.
З. АьбдурахIманова
Студентътал бакъасса, диктант чичавривух гьуртту хьунни цаппара министртал, Халкьуннал Мажлисрал депутатътал, жяматийсса ишккаккулт ва м.ц.. Аьмну 150-ннийн ивсса инсаннал гьурттушинна дунни ва давривух. Диктант мукунна чирчуссар республикалул цаппара муниципалитетирттайгу.
— Ниттил мазрай гъалгъа тIий, му ттигу щархъаву ишлану бунугу, шагьрурдайрив тагьар ххуйсса дакъар. КIива-шанма миллат хIала бувхсса ташурду, школардай ва садикирттаву оьрус маз ишла баву ва цаймигу ишру сававну, ниттил маз лув личIлай бур. Диктант даврил мурадгу ниттил мазрал сий гьаз дансса, ми иттала багьаврил масъалалух къулагъас дуллали банссар, — тIий ур ва даврил сакиншиндаралсса бувсса Миллатирттал политикалул ва диндалул иширттал министерствалул пишакар М. Даитбеков. Ванал бусаврийну, ларгмур шинал ДР-лул КIулшивуртту дулаврил министерствалул сипталий 8 миллатрал мазрайсса луттирду бавчIуну бур республикалул школарттайсса мюрщи классирттал дуклаки оьрчIайх. Гьашину тIурча, бачIинтIиссар хъуними классирттаву дуклакиминнайхгу.
