[dropcap]О[/dropcap]ктябрь зурул 11-нний МахIачкъалалив «Дусшиврул къатлуву» хьунни Дагъусттаннал аьрщарайн ххявхсса дунияллул террористал ххит бувну 20 шин шаврин ва Бесланнал школалий теракт дурну 15 шин шаврин хас дурсса мероприятие.

Ванил сакиншинначитал хьунни ДР-лул Миллатрал политикалул ва диндалул иширттал министерство, «Бесланнал нинухъру» тIисса Ухссавнил АьсатIиннал жяматийсса организация. Мероприятиялий гьуртту хьун бувкIун бия личIи-личIисса министерстварттал ва ведомстварттал, районнал ва шагьрурдал администрациярттал, жяматийсса организациярттал вакилтал, студентътал, дуклаки оьрчIру.

Андриана Аьбдуллаева
«Яхъананшиврул дакIний битан». («Помнить, чтобы жить») проектрал лагрулий хьунни 1999 шиналсса дяъвилул иширттал ва 2004 шинал сентябрь зурул 1-3-нний Бесланнал 1-мур школалий хьусса оьзрулул лахIзарду ккаккан буллалисса, тай ишир­ттаву жанну дуллусса «Альфа», «Вымпел» спецподразделениярттал аьралитурая бусласисса суратирттал выставка. Ттуршунния лирчусса суратру дия шикку ккаккиялун дирхьуну.

Мажлис тIивтIунни «Бесланнахсса реквием» тIисса литературалул ва музыкалул композициялийну. Композиция хIадур дурну дия Дарбантуллал оьрчIал ва мюрщи жагьилтурал творчествалул къатлул «ТалихI бу­сса оьрчIшиву» тIисса вокалданул студиялул. Дуклаки оьрчIал хъинну бюхханну ккаккан бунни ширишилун бувгьусса Бесланнал оьрчIай бувсса зулму-къия, оьрчIру террористурал зулмулия буруччин хIарачат буллай бивкIсса учительтурал къучагъшиву. Композиция наниссаксса хIаллай ва асар хьуну залдануву­сса циняв бивзун бавцIунни.
Хъирив ливтIуминнал аьпалун минутIрайсса пахъ багьаву дунни.

1999 шиналсса дяъвилул ишру ва 2004 шинал Ухссавнил АьсатIиннал шагьрулий Бесланнай хьусса теракт дакIнийн рутлатисса ихтилат бунни Дагъус­ттаннал миллатирттрал политикалул ва диндалул иширттал министр Энрик Муслимовлул, Аьрасатнал Виричу Загьид Загьидовлул, Дагъусттаннал хъаннил союзрал хъунмур Интизар Мамутаевал, Бесланнал ниттихъал.
Щалагу дунияллул халкь ца­чIун хьуну терроризмалущал талан аьркиншиву, ци миллатрал, диндалул бухьурчагу, инсантурайн ливксса бала цинявннан аьм­сса бушиву кIицI лавгунни ихтилатчитурал.

[dropcap]Ш[/dropcap]колалий ширишилун бувгьуну бивкIсса нинухъру виримукьал буцIлай дакIнийн бичлай бия оьзрулуща ххассал хьун къавхьусса цала оьрчIру. Вайннащал бувкIун бия та чIумал школалул къатраву бивкIсса, буккан бан бювхъу­сса оьрчIругу. Таний вайннан кIи-кIира шин диркIун дур.
— 2004 шинал сентябрь зуруй та иш хьуннин жун цаннанмагу жяматийсса давурттаха зун­сса пикри бакъассия. Иш укун багьунни. Утти жува цачIу шаймур буллантIиссару, укун­сса ишру тик­рал къахьун, Да­гъусттаннал халкьуннайнгу дуркссар кьини, зугу хьуссару язисса арсурваврацIа, — увкунни «Бесланнал нинухъру» организациялул Председатель Сусанна Дудиевал.
Ихтилатру къуртал хьуну махъ бувккунни шеърирду, ув­кунни балайрду.

Дагъусттаннай «Бесланнал нинухъру» организациялул вакилтал хьунабавкьунни респуб­ликалул жяматийсса палаталул каялувчи Аьбдулхалим Мачаевлущал ва миллатирттал политикалул министрнал хъиривчу Арсен МахIмудовлущал, Дагъус­ттаннал хъаннил Союзрал хъунмур Интизар Мамутаеващал, МахIачкъалаллал 1-мур школалул дуклаки оьрчIащал.