Дагъусттан бувкIунни цифралул телерадиовещаниялийн

[dropcap]О[/dropcap]ктябрьданул 14-нний «Аьрасат – ттул тарихри» тIисса тарихрал музейрал хьхьичI хьунни республика цифралул телерадиовещаниялийн дучIаврин хасъсса шадлугърал батIаву.

Муний гьуртту хьунни ДР-лул ХIукуматрал Председательнал хъиривчу Владимир Лемешко, СКФО-лийсса РТРС-рал вакил Александр Стадник, ДР-лул информациялул ва дахIавурттал министр Сергей Снегирев, ДР-лул РТРС-рал директор ХIажимурад Сяидов, ДР-лул жагьилтурал иширттал министр Камил Сяидов ва цаймигу.


БатIаврий махъру лахъайминнал бусаврийну, 1961 шиная 2019 шинайннин ккаккан дуллай бивкIун бур аналограл ТВ ва радио, хIакьину тIурча аналог лаг­лай дур тарихравун. ЦIанасса ппурттуву региондалий бацIан бувну бур цIусса 164 радиотелевизордал ретрансляциялул станция ва 40 аналограл станция цIубуккан бувну буccия.
Яла бавтIминнал ххал дунни аналограл махъра-махъсса сюжет. Дагъусттаннай аналограл вещание кьадагьан дунни Владимир Лемешкол. Мунал бувсунни му кьадагьан даншиврул циксса давуртту дурссарив.

Яла бавтIминнал хьхьичI ихтилат бунни Александр Стадник­лул. Мунал тIимунийну, Дагъусттаннал цифралул сеть дунияллий яла хъунмур дур. ЧIявуми станцияртту бацIан бувну бур зун­ттал районнай, масалдаран аналогралссарагу каналлу ккаккан къадуллай диркIсса Къурушиял шяраву. Утти тIурча яла яла архми зунттал шяраваллавугу цифралул сигналлу дугьлай дур.

Сергей Снегиревлулгу барча бунни дагъусттанлувтал цифралул телевидениялийн бучIаврищал. Мунал бусаврийну, хIакьину зунтIиссар 1400 колл-центрданул оператортал.
Яла ккаккан дурунни концертгу.