[dropcap]О[/dropcap]ктябрь зурул 22-нний Дагъусттаннал паччахIлугърал университетрал филологиялул факультетрай кIицI ларгунни Да­гъусттаннал миллатирттал культуралул ва мазурдил кьини. Байран сакин дурну дия Дагъусттаннал литературалул кафедралул ва студентътурал.

Имара Саидова
[dropcap]Б[/dropcap]усравсса хъамаллуравух ши­кку гьуртту хьунни ДГУ-рал ректор Муртазали Рабаданов, ДГУ-рал кIулшивуртту дулаврил проректор МахIаммад ХIасанов, тарбиялул даврил проректор Мадина МахIаммадова ва цаймигу. Мукунма, мероприятиялийн бувкIун бия республикалул школарттаясса учительтал ва дуклаки оьрчIру.

[dropcap]М[/dropcap]уртазали Рабадановлул, цинявппа гьурттучитал барчагу бувну, кIицI лавгунни ва кьини цалнияр цал ягинну тIайла дуклай бушиву ва укунсса байраннай ялун личлачишиву миллатрал культура лахьхьаврих гъира-шавкь дусса студентътал.
Хъирив Дагъусттаннал отделениялул студентътурал ккаккан дунни цалва миллатирттал аьдатру, цалва-цалва мазурдий увкунни балайрду, дунни къавтIавуртту.

Университетрал актовый залдануву тIивтIусса Дагъусттаннал миллатирттал майданнаву ца яла яргмур ва архниява хIисав хъанахъимур бия Дагъусттаннал халкьуннал литературалул кафедралул доцент Хазина Аминовал каялувшиндаралу хIадур бувсса лак­рал миллатрал культуралул ва багьу-бизулул мурцIу. Ва ххуллухсса байрандалий гьуртту хьун бувкIун бия МахIачкъалаллал 37-мур школалий лакку мазрал дарсру дихьлахьисса Парамазова Умамат ва ванил дуклаки душру Камила ва Забида Оьмариевахъул.

Асар хьунну ва тIааьнсса чIуний увкунни вайннал МухIуттин Чариновлул му­къурттийсса лакрал гимн. ЦIа дан­сса бия шиккува тIивтIусса ла­кку дукрардал ссупрагу. Цинявппагу лагма лавгун, цIухху-бусурду буллай бия хьамаран лархъун нанисса дукьрахIан, къячIив, хьхьахьхьари, аьрайн гьавккуртту ча бучIан барду тIий. Хазина Аминова студентътурал цIания барчаллагьрай бия байрандалун хасну ххаллилсса ссупра тIитIин кабакьу бувсса цIанихсса «Инт» этно-кафелул зузалтрайн ва ва кьини ишла дан хьхьичIарасса кьай-кьуй ларсун бувкIсса Басират Шамххаловайн.