Учительнал дакIнил гъилишиву, бакIрал аькьлу, чурххал цIуллушиву харж дуллай ур оьрчIан. Гьич дакъахьунссар вай иширттаяр ялттусса хъиншивугу. 

Жухь зунттавусса шяраваллаву школарттай дуклай бивкIсса оьрчIахь ца чIумал: «Учитель къатIий, зула учительнал цIагу, буттал цIагу тIун аьркинссар», — тIий дюъ дихьлан бивкIуна. Къавхьуна жуща ялагу ва УЧИТЕЛЬ тIисса цIа дяххан дуван. Мукунсса дур ванил лахъшиву ва хIурматрай зумух ласун ччан дикIайшиву.

---

[dropcap]О[/dropcap]ктябрь зурул 6-нний Кку­ллал шяраву, Аьрасатнал Виричу Халид Мурачуевлул цIанийсса 1-мур школалул хIаятраву хьунни Ккуллал шяраву школа тIивтIуну 90 шин там шаврин хас дурсса тяхъашиву-байран.Шиккун байрандалийн гьуртту хьун бувкIун бия чIявусса, школалий дуклай бивкIсса, учительталну зий бивкIсса инсантал. ХIаятраву чIюлу бувну бия мажлис бачин буллалисса кIану. Ва кIанттул лагмава бавцIуну бия циняв классирттал оьрчIру.

Тяхъашиврий гьуртту хъанай бия: Кку­л­лал 1-мур школалул директор Чаринов МахIаммад, Ккуллал райондалул бакIчинал хъиривма ХIусманов Ажуб, райондалул кIулшиву дулаврил управлениялул каялувчи ТIилиев Камил, Ккуллал шяраваллил

бакIчи Аьли­ев Рамазан, 60 шинай школалий учительну зий ивкIсса Дагъусттаннал ва Аьрасатнал хIурмат лавай­сса учительнал цIанин лайкь хьу­сса Кьурбанов МахIаммад, ва школа къуртал бувсса, чIярусса шиннардий Да­гъусттаннал аэропортрал каялувчину зий ивкIсса Жабраилов Алексей ва цаймигу хIурмат лавайсса гьалмахтал.

Тяхъашиву дайдирхьуна Аьра­сатнал ва Дагъусттаннал гимру щаллу даврийну. Яла Ккуллал шяраву школа тIитIаврил тарихрая кутIасса бусаву дуруна школалул директор Чаринов МахIаммадлул. Ванал цала бусавриву кIицI бувуна цалчин Ккуллал шяраву светский школа хIасул бувну бивкIшиву 1912-ку шинал. Ганияр махъ 1929-ку шин хъанай душиву цIусса хIукуматрал школа хIасул бувсса чIуннугу. Ганияр махъ школалий дуклай бивкIун бур 5600 оьрчI.

Ши­кку школа къуртал бувсса оьрчIава увккун ур 7 элмулул доктор, 40 элмулул кандидат, 40 хIаписар, 80 оьрчI-душнил къуртал бувну бур школа мусил ва арцул медаллу ларсун. ЦIанагу школалий зий бусса бия 26 учитель. Миннавату ххюннал дусса дия хIурматрал цIарду. КIицI бувна директорнал мукунма «100 школа», — тIисса программалул лагрулуву школалий дуклай бивкIсса оьрчIал кумаг бувшиву. Гайннайн барчаллагь баян буллай ушиву бувсуна

Яла дуллуна кумаг буллай бивкIсса меценатътуран грамотартту ва хIурматрал чагъарду. Школалул тарихраясса макьалар­тту хIадур дуллай, гай «Илчи» кказитрай рищлай икIаврин бувну, зул корреспондентнангу буллуна барчаллагьрал чагъар.

Ххуй-ххуйсса ихтилатирттайну школалул оьрчIру, учительтал, нитти-бутта барча бувуна Райондалул бакIчинал хъиривма ХIусманов Ажублул, райондалул кIулшиву дулаврил управлениялул каялувчи ТIилиев Камиллул, 60 шинай школалий дарс дихьлай ивкIсса Кьурбанов МахIаммадлул, Жаб­раилов Алексейл, школалул за­вуч Мамаев Рамазаннул ва цайминналгу. Цаппара учительтуран дуллуна «ДР-лул лайкь хьусса учительтал», — тIисса хIурматрал цIарду.
Гьай-гьай, дия школалун ду­ллай чIаравбацIултрал чулухасса, выпускниктурал чулухасса багьлул ххирасса бахшишругу. Ми дия ссят, чIирайн лахъайсса суратру, компьютерданул техника ва цаймигу затру.
ХIаятравусса тяхъашиву мадарасса ссятурдий лахъи ларгуна.Яла гания гихуннаймур тяхъашиву дия ссупралух.

Репортаж хIадур дурссар
ХI. ХIусайновлул