ТIитIа винмасса Ккавкказ!

[dropcap]Л[/dropcap]аргсса нюжмаркьини ДГТУ-луву «ТIитIа Ккавкказ» тIисса проектрал лагрулийсса Щала билаятрал жагьилтурансса реалити-шоулул хIасиллая бусласисса ва гьурттучитурахьхьун суаллу буллалисса пресс-конференция хьунни.Проектрал сакиншинна дурну дур СКФО-райсса жагьилтурал иширттаха зузисса федерал департаментрал, ДР-лул Туризмалул ва художествалул сянатир­ттал ва ДР-лул жагьилтурал иширттал министерстварттал.


Залму АьбдурахIманова
Пресс-конференция бачин бувну ия проектрал каялувчи Сааьду Кказиев. Ванал бувсуна проектрал мурадраягу, Дарбантлив хьусса реалити-шоулул съемкардая ва гьурттучитураягу цIубакIрай гьарта-гьарзану.

Цурда «ТIитIа Ккавкказ» цIанилусса ва проект республикалий щурущи дурну дур Ух­ссавнил Ккавкказуллал этнокультуралул авадансса ирсиращал гьурттучитал кIул бансса ва машгьур дансса мурадращал, ва уттизаманнуха лавхьхьуну Интернетрал кумаграйну Аьрасатнал ца яла аьвзалзаманнул шагьрулун ккаллийсса Дарбантлия щала билаятрал агьулданухьгу бусаншиврул.

[dropcap]Р[/dropcap]еалити-шоулул съёмкардавух гьуртту хьун оьвкуну бивкIссар билаятрал цайми регионнаясса, социал сетирдаву жагьилтурал дяниву бусрав-сий дусса 7 блогернайн.

Вай цивппагу бия жула республикалийн цалчин бувкIсса, Дагъусттанная так ца телевизорданува, Аьрасатнал СМИ-рдава бав­сса жагьилтал. Сакиншинначитурал бусаврийну, Ухссавнил Ккавкказуллайсса цалчинсса реалити-шоулул съёмкарду Дарбантлив най диркIссар ва зурул 5-11-ннин.

[dropcap]Н[/dropcap]южмардул дяниву съёмкардал гьурттучитуран багьлай бивкIссар Ухссавнил Ккав­кказуллал миллатирттал аьда­тирттащал, багьу-бизулущал ва халкьуннал касмурдащалгу кIул хьуну, цалагу цаятура тIалав дуллалисса куццуй гай тикрал дуван. Мисалдаран, бартбисур­тту щащан, тIахIунттив дуван, ккурттачIатIаракI ритан, ххункI буван ва зунттал билаятрай машгьурсса лезгинкалий бизан.
Вай дакъасса, жагьилтурая тIалавну диркIун дур Дарбантуллал базаллуву машагу бувну, даххултрая цаннамур дуккан.

«Жун Дагъусттаннай, Дарбантлив куннасса хъамалушинна ттинин оьрмулуву чувчIав къа­ккаркссар. Укунсса дакI хъиншиву лагмара, хъуни кIичIирттая байбивхьуну, къума махIлардайн дияннин, дикIан бюхъай­ссарив тIий, махIаттал хьуну бивкIру. КIукъакIулсса цумацагу инсаннахьхьун ссалам булайни, «Вааьлейкум Ассалам» къаучай­сса, яхши-хаш къабай­сса цучIав акъая!»,-тIий буслай бия гьур­ттучиталгу. ХIайран бувну бия гай кIанттул дукрардал тIааьншиврулгу. КIицI бувна жагьилтурал, чIал къавхьуну цивппа цIунилгу укунма­сса туристътал хIисаврай Да­гъусттаннайн бучIан дакIний бушиву. Дарбантлив вай гьан­тта бикIлай, нюжмардул дяниву ялапар хъанайгу бивкIссар уттигъанну ги­кку тIивтIусса этнокъатлуву. Вагу жучIанма букIлансса туристурансса ххуй­сса хIаллихшиннар.
Журналистурал суаллахьхьун жавабру дуллуну махъ, проект­рал сакиншинначитурал хъамаллуран дакIний личIансса бахшишругу дуллуну, цинявннал цачIусса сурат рирщуна.